ओलीले प्रधानमन्त्रीलाई भने- ईपीजी प्रतिवेदन बुझ्नुस्, सदनलाई जानकारी गराउनुस् (भिडिओ)

काठमाडौं । पूर्वप्रधानमन्त्री तथा प्रमुख प्रतिपक्षी दलका नेता केपी शर्मा ओलीले नेपाल र भारतले गठन गरेको प्रबुद्ध व्यक्तिहरूको समूह (ईपीजी) ले बनाएको प्रतिवेदन बुझ्न प्रधानमन्त्री शेरबहादुर देउवालाई आग्रह गरेका छन् । प्रतिवेदन बुझेर यसका अन्तरवस्तु संसदलाई जानकारी गराउन उनले सुझाव दिए ।

संसदमा आज भाषण गर्दै ओलीले भने, ‘नेपाल र भारतका दुई प्रधानमन्त्रीले औपचारिक वार्तामा बसेर गठन गरेको इपिजी समूहले दुईपक्षीय सहमतिमा बनाएर दुई वर्षभन्दा बढी काम गरेर बनाएको रिपोर्ट बुझे बुझाएको छैन । के भनियो भने भारतले बुझेन । म प्रधानमन्त्रीज्यूलाई आग्रह गर्न चाहन्छु, एउटा प्रधानमन्त्रीले पहिले बुझ्नुपर्‍यो नि ? नेपालले किन बुझ्दैन ? प्रधानमन्त्रीज्यू ईपीजी प्रतिवेदन बुझेर सदनलाई जानकारी गराउनुस् ।’

ईपीजी प्रतिवेदन सन् २०१९ मा नै तयार भएको थियो । ओली स्वयम् प्रधानमन्त्री पदमा हुँदा यो प्रतिवेदन बुझेका थिएनन् । अहिले उनले देउवालाई बुझ्न सल्लाह दिएका छन् ।