त्रियुगामा कांग्रेस र नेकपा एसका उम्मेदवारबीच कडा टक्कर

काठमाडौं । उदयपुरको त्रियुगा नगरपालिकामा अहिले मतगणना चलिरहेको छ । निर्वाचनमा धाँधली भएको भन्दै विवाद हुँदा ढिलोगरी मतगणना सुरू भएको हो ।

मतगणना सुरु भएपछि भने सुरूदेखि नै नेपाली कांग्रेसका मेयरका उम्मेदवार बसन्तकुमार बस्नेत र नेकपा माओवादी केन्द्रसँगको गठबन्धनमा लडेका नेकपा एकीकृत समाजवादीका उम्मेदवार बलदेव चौधरीबीच रोचक टक्कर भइरहेको छ । चौधरी निवर्तमान मेयर पनि हुन् । उनले अघिल्लो निर्वाचन नेकपा एमालेबाट जितेका थिए ।

पछिल्लो मतगणनामा चौधरीले कांग्रेस उम्मेदवार बस्नेतसँग ६७ मतले अग्रता लिएका छन् । चौधरीले ३ हजार ५७२ मत पुर्‍याउँदा बस्नेतले ३ हजार ५०५ पुर्‍याएका छन् । एमाले उम्मेदवार भागवत रावतले २ हजार ५१८ मत पुर्‍याएर तेस्रो स्थानमा छन् ।

उपमेयरतर्फ भने कांग्रेस उम्मेदवार सरिता राईले केही फराकिलो मतान्तर बनाएकी छन् । उनले ३ हजार २०५ मतसहित अग्रता लिइरहँदा नेकपा एससँगको गठबन्धनमा लडेकी माओवादी केन्द्रका गीता खड्का कार्कीले २ हजार ९३५ मतसहित पछ्याइरहेकी छन् । एमाले उम्मेदवार महेश्वरी राई २ हजार ७५९ मतसहित तेस्रो स्थानमा छिन् ।