जोकोभिचलाई हराउँदै नाडाल फ्रेन्च ओपनको सेमिफाइनलमा
काठमाडौं । विश्व नम्बर एक नोभक जोकोभिचलाई हराउँदै २१औं पटकका ग्राण्डस्लाम विजेता राफेल नाडाल फ्रेन्च ओपनको सेमिफाइनलमा प्रवेशका छन् ।
पेरिसस्थित फिलिप चार्टियरकोर्टमा सम्पन्न क्वार्टर फाइनल खेलमा जोकोभिचलाई ६–२, ४–६, ६–२, ७–६ (७–४) को सेटमा पराजित गर्दै नाडालले सेमिफाइनल यात्रा तय गरेका हुन् ।
नाडालले सेमिफाइनलमा शुक्रबार वरीयताको तेस्रो नम्बरका एलेक्जेन्डर जेभरेभको सामना गर्नेछन् ।
जेभरेभले क्वार्टरफाइनलमा छौटौं वरीयताका कार्लोस अलकाराजलाई ६–४, ६–४, ४–६, ७–६ (९–७) को सेटमा पराजित गर्दै सेमिफाइनलमा नाडालसँगको भेट पक्का गरेका थिए ।
नाडालसँग हारेसँगै जोकोभिचले ग्राण्डस्लाम कीर्तिमान बराबर गर्ने अवसर गुमाएका छन् । जोकोभिच र रोजर फेडेररले समान २० पटक ग्राण्डस्लाम जितेका छन् ।