बजेट: गण्डकीलाई सबैभन्दा कम, कर्णाली प्राथमिकतामा

सुर्खेत । संघीय सरकारले अन्तरसरकारी वित्तीय हस्तान्तरणअन्तरगत आर्थिक वर्ष २०७९–८० का लागि बजेट पठाएको छ ।

अर्थ मन्त्रालयले प्रदेशमा पठाएको बजेटअनुसार सबैभन्दा बढी वागमती प्रदेशले पाएको छ । वाग्मती प्रदेशले २० अर्ब ३२ करोड ६६ लाख बजेट पाउँदा सबैभन्दा कम गण्डकी प्रदेशले पाएको छ । यो प्रदेशले १६ अर्ब ५४ करोड ३२ लाख बजेट अर्थ मन्त्रालयबाट पाएको छ । यस्तै, प्रदेश नम्बर एकले १९ अर्ब नौ करोड ९१ लाख बजेट पाएको छ भने मधेस प्रदेशले १९ अर्ब १५ करोड नौ लाख रुपैयाँ बजेट पाएको छ ।

लुम्बिनी प्रदेशले १८ अर्ब ४७ करोड ६४ लाख बजेट पाउँदा कर्णालीले १८ अर्ब ३० करोड ६१ लाख पाएको छ । सुदूरपश्चिम प्रदेशले १७ अर्ब ५५ करोड ८३ लाख बजेट पाएको छ ।

कर्णाली प्रदेशले समानीकरण अनुदानमार्फत न्यूनतम अनुदानअन्तरगत एक अर्ब ७९ करोड ८९ लाख पाएको छ भने सुत्रमा आधारित अनुदानबाट ८ अर्ब ५९ करोड ९१ लाख पाएको छ । त्यस्तै कार्यसम्पादनमा आधारित अनुदान ३१ करोड ७४ लाख पाएको छ ।

सशर्त अनुदान ६ अर्ब ९८ करोड ८० लाख पाउँदा विशेष अनुदान शीर्षकमा ७९ करोड ७८ लाख रुपैंया पाएको छ । त्यस्तै, समपूरक अनुदान पुंजीगततर्फ कर्णालीले ७६ करोड ५० लाख पाएको छ ।