मुख्यमन्त्री पाण्डेको आरोप : बालेन्द्र साहमा आलोचना सुन्ने धैर्यता देखिएन

काठमाडौं । अहिले काठमाडौंको फोहोरको विषयलाई लिएर बागमती प्रदेश सरकार र काठमाडौं महानगरपालिकाबिच ‘टसल’ को अवस्था देखिएको छ ।

हिजो बाग्मती प्रदेशले आयोजना गरेको अभिमुखीकरण कार्यक्रमपछि महानगरपालिका र प्रदेश सरकारबीच तनाव सुरु भएको हो ।

प्रदेश सरकारका अर्थमन्त्रीले काठमाडौंको फोहोर अरू पालिकामा फाल्न नपाउने बताएपछि असन्तुष्ट भएर मेयर साह कार्यक्रम नै छोडेर हिँडेका थिए । उनले अभिमुखीकरण कार्यक्रममा काठमाडौं महानगरलाई गाली मात्रै गरिएको आरोप लगाएका छन् ।

दुई दिने अभिमुखीकरण कार्यक्रम आज समापन भएको छ । उद्घाटनको दिन कार्यक्रम छोडेर हिँडेका काठमाडौंका मेयर र उपमेयर दोस्रो दिन सहभागी भएनन् । यो विषयलाई बाग्मती सरकारले कसरी हेरेको छ रु हामीले बाग्मतीका मुख्यमन्त्री राजेन्द्र पाण्डेसँग संक्षिप्त कुराकानी गरेका छौ ।

मुख्यमन्त्री पाण्डेले अर्थमन्त्रीले राखेको धारणा उनको व्यक्तिगत भएको बताए । आफूले यो कुरा भाषणमा नै प्रस्ट्याएकाले काठमाडौंका मेयर असन्तुष्ट हुनुपर्ने कारण नभएको उनको भनाइ छ । मेयर साहले अभिमुखीकरण कार्यक्रम नै बहिष्कार गरेको विषयमा भने आफू अनभिज्ञ रहेको उनले बताए ।

‘उहाँले आफ्नो व्यक्तिगत धारणा राख्नुभएको हो । मैले प्रमुख अतिथिको रूपमा बोल्दा काठमाडौंको फोहोर उठाउने कुरामा आफूहरू जुनसुकै भूमिका निभाउन तयार रहेको स्पष्ट पारेको छु । काठमाडौं पनि बागमती प्रदेशभित्रै महानगर भएकाले यहाँको फोहोरको चिन्ता हामीलाई पनि उत्तिकै छ,’ पाण्डेले भने ।

उनले मेयर साहको विषयमा टिप्पणी गर्दै राजनीतिक व्यक्ति नभएकाले आलोचना सहने क्षमता नदेखिएको बताए ।

पाण्डेले भने, ‘कसैले उहाँको विरोध गर्नै नपाउने, आलोचना गर्नै नपाउने भन्ने हुँदैन । त्यस्तो भयो भने त अर्को तानाशाही जन्मिहाल्छ नि । उहाँ त्यो बाटोमा जानु भएन । आलोचना सुन्न सक्ने क्षमता विकास गर्नुपर्छ ।’

अहिले देश नै बालेन्द्रमय भएको र उनको विषयमा केही बोल्नै नहुने माहोल बनाइएको भन्दै पाण्डेले चिन्ता व्यक्त गरे ।

‘उहाँलाई जनताले निर्वाचित गरेर मेयर बनाएका हुन् । केशव स्थापित र सिर्जना सिंहभन्दा केही बढी भोट ल्याएर उहाँले जित्नुभएको हो । त्यसैले आफूलाई सर्वोपरि ठान्नु हुँदैन,’ उनले भने ।

मेयर साहले आफ्नो घरमै आएर फोहोर व्यवस्थापनका बारेमा छलफल गरेको पनि पाण्डेले सुनाए । पाण्डेका अनुसार साहले सेना परिचालन गरेर भए पनि काठमाडौंको फोहोर व्यवस्थापन गर्नुपर्ने प्रस्ताव गरेका थिए ।

‘त्यसमा मैले सहमति जनाइनँ,’ उनले भने, ‘जनतामाथि सेना प्रयोग गर्न मिल्दैन र तपाईँ यस्तो बाटोमा नलाग्नुस् भनेर सुझाव दिएको हुँ ।’

पाण्डेले काठमाडौंको फोहोर बन्चरे डाँडामा फाल्नु नै दिगो समाधान नहुने तर्क गरे । त्यहाँका स्थानीयवासीको पीडा पनि सम्बोधन हुनुपर्ने उनको भनाइ थियो ।

‘फोहोर फाल्ने ठाउँका समस्या के के हुन् र त्यसलाई कसरी सम्बोधन गर्न सकिन्छ भनेर पनि ध्यान दिनपर्ने छ’ उनले भने, ‘बन्चरे डाँडामा लगेर फोहोर फालेर मात्र हुँदैन, त्यसको उचित व्यवस्थापन पनि गर्नुपर्छ ।’

फोहोरबाट निस्केको ग्यास, आएको दुर्गन्ध र पानीमा फैलिएको फोहोरलाई कसरी व्यवस्थापन गर्ने भन्ने कुरामा पनि ध्यान दिन जरुरी रहेको उनले बताए ।

आफू संघीय मन्त्री भएको बेला त्यहाँको सडक निर्माण, स्वास्थ्य चौकीको निर्माण र विद्यालयहरूमा १ सय जनालाई रोजगारीको व्यवस्था गरेको उनले उल्लेख गरे ।