चुराेटमा निकोटिनको मात्रा घटाउँदै अमेरिका

काठमाडाैं । अमेरिकाले चुराेटमा निकोटिनलाई ‘गैरकुलत’ तहमा घटाउने नयाँ नीति घोषणा गर्ने तयारी गरेको छ । यसका लागि सरकारले उत्पादकहरूसँग छलफल गरिरहेको छ ।

चुरोटमा सरकारको कदमले सुर्ती उद्योगलाई ठूलो धक्का पुग्ने अनुमान गरिएको छ । यो नीति सफल भएमा यसै शताब्दीको अन्त्यसम्ममा लाखौं जीवन बचाउन सकिने र यसले भविष्यलाई एउटा आकार दिनेछ, जहाँ चुरोट अब लत र दुर्बल रोगहरूको लागि जिम्मेवार हुनेछैन ।

निकोटिन यस्तो रसायन हो, जसले लाखौंलाई सुर्तीजन्य उत्पादनहरूमा जोड्छ । सुर्तीजन्य पदार्थमा हुने अन्य हजारौं रसायन र यसको धूवाँले क्यान्सर, मुटुरोग, मस्तिष्कघात, फोक्सोको रोग, मधुमेहलगायतका रोगहरू निम्त्याउने गर्छ ।

यद्यपि युरोपको तुलनामा अमेरिकामा धूमपान कम प्रचलित र घट्दै गए पनि रोग नियन्त्रण र रोकथाम केन्द्र (सीडीसी) का अनुसार यो देशमा प्रतिवर्ष ४ लाख ८० हजार मृत्युमा जिम्मेवार छ । सीडीसीको तथ्यांकअनुसार सबै अमेरिकी वयस्कहरूको लगभग १३ दशमलब ७ प्रतिशतले चुरोट पिउँछन् । चुरोटमा निकोटिनको मात्रा घटाउने सवाल अमेरिकी अधिकारीहरूबीच वर्षौंदेखि चर्चाको विषय बनेको छ ।

सीडीसीका अनुसार धूमपानको कुल आर्थिक लागत प्रतिवर्ष ३ सय अर्ब डलरभन्दा बढी छ ।