हेटौंडामा बन्धक बनाएर फिरौती रकम माग्ने तीनजना पक्राउ

हेटौंडा । मकवानपुरको हेटौंडा उपमहानगरपालिका– १० बसपार्कको एक होटलमा बन्धक बनाएर फिरौती रकम मागेको आरोपमा ३ जनालाई पक्राउ गरिएको छ ।

मकवानपुर प्रहरीका अनुसार हेटौडा उपमहानगरपालिका वडा नं १५ बस्ने २९ वर्षीय सुरेश लामा, वडा नं १२ बस्ने २१ वर्षीय समीर बल र २८ वर्षीय अशोक लामालाई पक्राउ गरिएको हो ।

उनीहरुले बसपार्कस्थित ट्राभल होटल एण्ड लजको रुम नम्बर १०७ मा पर्साको वीरगञ्ज महानगरपालिका १९ बस्ने २७ वर्षीय अमनकुमार श्रीवास्तवलाई बन्धक बनाएका थिए । श्रीवास्तवलाई डर तथा धम्की दिएर परिवारसँग फिरौती रकम माग्न फोन गर्न लगाएको जिल्ला प्रहरी कार्यालय मकवानपुरले जनाएको छ ।

फिरौती मागेको ३ दिनपछि आफुहरुलाई जानकारी गराएअनुसार खोजतलास गर्दा बसपार्कको होटलबाट श्रीवास्तवको उद्धार गरिएको र फिरौती माग्नेहरुलाई पक्राउ गरिएको मकवानपुरका प्रहरी प्रवक्ता रामचन्द्र घिमिरेले जानकारी दिए ।

प्रहरीले फिरौती रकमबारे खुलासा गरेको छैन । पक्राउ गरिएकाहरुलाई म्याद थप गरी आवश्यक अनुसन्धान अघि बढाइएको प्रहरीको भनाइ छ ।