नेकपा बैठक सकियो, दुई अध्यक्षको सहमति अनुमोदन

काठमाडौं । नेकपा स्थायी कमिटी बैठकले दुई अध्यक्ष केपी शर्मा ओली र प्रचण्डबीचको सहमतिलाई अनुमोदन गरेको छ । बुधवार साँझ सम्पन्न बैठकले संवैधानिक परिषदसम्बन्धी अध्यादेश र संसदको अधिवेशन माग गरेर पेश गर्न लागिएको आवेदन दुवै फिर्ता लिने सर्वसम्मत निर्णय गरेको प्रवक्ता नारायणकाजी श्रेष्ठले बताए ।

बैठकमा अध्यक्ष तथा प्रधानमन्त्री ओलीले मंगलबारको संवैधानिक परिषद बैठकमा संवैधानिक अंगहरुमा नियुक्तिसम्बन्धी कुनै निर्णय नभएको जानकारी गराएको समेत प्रवक्ता श्रेष्ठले बताए । स्थायी कमिटीको अर्को बैठक पुस ५ गते बस्ने भएपछि ५ गतेलाई निर्धारित केन्द्रीय कमिटी बैठक पुस १० गतेलाई सारिएको छ ।