सीसीटीभीको फुटेज कति दिन रहन्छ मलाई के थाहा ?- अर्थमन्त्री

काठमाडौं । अर्थमन्त्री जनार्दन शर्माले अर्थमन्त्रालयको सीसीटीभीको फुटेज कति दिन रहन्छ भन्ने आफूलाई थाहा नहुने बताए ।

शर्माले संसद्मा बोल्दै भने, ‘कुन ठाउँमा सीसीटीभी फुटेज रहन्छ भन्ने मलाई के थाहा ? यही संसद् भवनमा सीसीटीभी फुटेज कति दिन रहन्छ हामीलाई कसरी थाहा हुन्छ । त्यो कुरा सम्बन्धित व्यक्तिलाई मात्रै थाहा हुन्छ । म अर्थमन्त्री हुनुभन्दा पहिले नै सीसीटीभी जडान भएको हो ।’

सांसददेखि उपभोक्ता मञ्च समेतले जेठ १४ गते रातिको सीसीटीभी फुटेज सार्वजनिक गर्न माग गरिरहेका वेला अर्थले पत्र निकालेर सीसीटीभी फुटेज नै डिलिट भएको जानकारी गरायो । मन्त्रालयले १३ दिनसम्म मात्रै फुटेज सेभ रहने भनेर उल्लेख गरेको थियो ।

अर्थले प्रश्न उठेपछि १३ दिनमा नै फुटेज डिलिट हुन्छ भनेर कुनै जानकारी गराएन । तर, बजेट आएको एक महिनाभन्दा धेरै भएपछि उसले १३ दिनमा फुटेज डिलिट भएको दाबी गरेको छ ।