प्रचण्डलाई गोकुल बाँस्कोटाको जवाफ- संघीयता अप्राकृतिक गर्भाधानको ठिम्मन !

काठमाडौं । नेपालमा संघीयतालाई निरन्तरता दिनु नहुने वकालत गर्दै आएका एमाले नेता तथा पूर्वसञ्चारमन्त्री गोकुल बाँस्कोटाले माओवादी अध्यक्ष पुष्पकमल दाहाल ‘प्रचण्ड’ लाई जवाफ फर्काएका छन् । आज एक कार्यक्रममा प्रचण्डले एकथरि नेताहरूले संघीयता खारेजीको आवाज उठाइरहेको भन्दै यसले राजतन्त्र फर्काउने तर्क गरेका थिए ।

प्रचण्डको भाषणलगत्तै बास्कोटाले सामाजिक सञ्जालबाट जवाफ दिएका हुन् । उनले संघीयताको माग जनताले कहिल्यै नगरेको र यो अप्राकृतिक गर्भाधानको ‘ठीम्मन’ भएको बताएका छन् ।

बास्कोटाको ट्वीट यस्तो छ-

सुप्रिमोले भनेछन् संघीयता ठीक छैन भन्नु राजतन्त्र फर्काउने कुरा हो । २०६२/६३ मा दुई बन्दुके मिलेर सत्ता बाँड्ने तारतम्य मिलाउने काम भैरहेको बेलामा सडकमा आमजनताले गणतन्त्रको नारा घन्काउदै थिए, संघीयताको थिएन । यो अप्राकृतिक गर्भाधानको ठिम्मन हो ।

बास्कोटाले दुई दिन अघि मात्रै संघीयता आवश्यक नरहेको भन्दै ट्वीट गरेका थिए । उनले जिल्ला समन्वय समिति पनि भंग गर्नुपर्ने मत राखेका छन् ।