देउवालाई अर्जुननरसिंहको जवाफ- पार्टी कार्यालयमै हामी सबै अट्ने ठूलो कोठा दिनुस्

काठमाडौं । नेपाली कांग्रेसको जारी केन्द्रीय समिति बैठकमा पार्टी प्यालेसमा गुट भेला गरेको भन्दै सभापति देउवा एवं प्रधानमन्त्री शेरबहादुर देउवाले गरेको टिप्पणीप्रति शेखर पक्षका नेताले जवाफ फर्काएका छन् ।

कांग्रेस नेता अर्जुननरसिंह केसीले आफ्ना समूहका सबैजना आँट्ने गरी पार्टी कार्यालयमा ठूलो कोठा दिए त्यहीँ बसेर छलफल गर्ने बताएका छन् ।

‘ठूलो कोठा दिइयोस् । हाम्रो समूहका सबै साथीहरू अटुन् । बाहिर भेला गर्दैनौं । पार्टी कार्यालयमै छलफल गर्छौं ‘, केसीले भने ।

पदाधिकारीलाई समेत बस्ने ठाउँ नभएको भन्दै उनले विगतमा रामचन्द्र पौडेललाई कोठा छुट्याइएकोमा अहिले देउवासँगै लडेर पराजित भएका शेखर कोइरालालाई बस्ने ठाउँ नभएकोमा आपत्ति जनाए ।

सभापति एवं प्रधानमन्त्री देउवालाई अहिले समूहको भेलालाई अनौंठो नमान्न पनि उनले आग्रह गरेका छन् ।

‘अहिले समूहको भेलालाई अनौंठो मान्ने शेरबहादुरजीले विगत सम्झनुपर्छ । हिजो उहाँ प्रतिपक्षमा हुँदा गरेका भेलाबारे उहाँले के भन्नुहुन्छ ?, – केसीले सोधे ।