कांग्रेस बैठकमा प्रश्न – सभापति ज्यू ! तराईमा कांग्रेस चाहिँदैन ?

काठमाडौं । नेपाली कांग्रेसकी केन्द्रीय सदस्य मिनाक्षी झाले गठबन्धनका नाममा मधेस प्रदेशमा कांग्रेस सिध्याउन खोजेको टिप्पणी गरेकी छन् ।

जारी केन्द्रीय सदस्य बैठकमा आफ्नो भनाइ राख्ने क्रममा झाले कांग्रेसको टिकट खोस्दै प्रतिस्पर्धीलाई टिकट दिएर पार्टी कमजोर बनाएको बताइन् ।

‘२ नम्बर प्रदेशमा हाम्रो प्रतिस्पर्धा गर्ने पार्टीलाई टिकट दिएर कांग्रेस सिध्याउन खोजेको हो ? तराईमा कांग्रेस चाहिँदैन सभापति ज्यू ? किन महत्त्व बोक्ने जनकपुरमा हामीलाई टिकट दिइएन ?, सभापति शेरबहादुर देउवालाई प्रश्न गर्दै उनले भनिन्, ‘जसपालगायत क्षेत्रीय पार्टीहरूसँग भिड्नु छ कांग्रेस बनाउन हामी लागेका छौं । अनि हाम्रै जनकपुरमा टिकट खोसेर जसपालाई दिएपछि हामी कसरी लड्ने ? अब तराईमा कांग्रेस चाहिँदैन सभापति ज्यू ?’