वागमतीमा टेण्डर नगर्न एउटै योजनालाई ८७ टुक्रा पारियो

हेटौँडा । वागमती प्रदेशअन्तर्गत भौतिक पूर्वाधार विकास मन्त्रालयले टेण्डर गर्नुपर्ने एक डीपीआरलाई ८७ वटा टुक्रा बनाएर नजिकका कम्पनीमार्फत काम गरेको पाइएको छ ।

महालेखा परीक्षकको कार्यालयको हालै सार्वजनिक प्रतिवेदनले साना टुक्रा बनाएर काम गर्दा सरकारलाई ६ करोड रूपैँया घाटा लागेको औंल्याएको छ । कमिसनको चक्करमा परेर कर्मचारीको गिरोहबाट यस्तो अनियमितता भएको स्रोतले बताएको छ ।

महालेखाको प्रतिवेदनमा मन्त्रालयले गरेको डीपीआरमा प्रश्न उठाएसँगै कर्मचारीमा खैलाबैला सुरू भएको एक कर्मचारीले बताए । ११ करोड ८९ लाख ७७ हजारको परामर्श सेवा एउटै प्याकेजमार्फत टेण्डर आह्वान हुनुपर्नेमा प्रतिस्पर्धा नै गर्नु नपर्ने गरी मन्त्रालयले ८७ वटा टुक्रा बनाएको हो ।

१४९ वटा योजनाको विस्तृत परियोजना अध्ययन लागत अनुमानकै आधारमा टुक्रा-टुक्रा पारेर काम गरेकोमा महालेखाले प्रश्न गरेको छ । मन्त्रालय मातहतकै पूर्वाधार विकास निर्देशनालय विद्युतीय बोलपत्र मार्फत ७ वटा पुलको डीपीआर गर्दा ५५ दशमलब ४२ प्रतिशत र ५ वटा पुलको अर्को डीपिआर गर्दा ४४ दशमलब १६ प्रतशत थोरैमा सम्झौता भएको छ ।

आफ्नै मातहतको निर्देशनालयले टेण्डरमार्फत गरेको काममा ५० दशमलब ९ प्रतिशत घटेर काम भएको छ । यसैलाई तुलना गर्दा पनि बोलपत्रको तुलनामा ५ करोड ९५ लाख ९६ हजार रुपैया प्रदेश सरकारलाई व्ययभार थपिएको हो ।

महालेखाको प्रतिवेदनले भौतिक मन्त्रालयमा सबैभन्दा बढी बेरुजू देखाएको छ ।