अढाई वर्षपछि संसदले पायो उपसभामुख, संवैधानिक परिषदमा गठबन्धनको बहुमत (भिडिओ)
नेपाल प्रेस
२०७९ असार ३१ गते १६:५५
काठमाडौं । लामो समयदेखि खाली रहेको संसदको उपसभामुख पद अन्ततः सत्तारुढ दल कांग्रेसको पोल्टामा परेको छ । कांग्रेसकी सांसद पुष्पा भुसाल एमालेकी विद्या भट्टराईलाई पराजित गर्दै उपसभामुख निर्वाचित भइन् ।
आज भएको चुनावमा खसेकाे २४२ मध्ये १४८ मत ल्याउँदै भुसाल विजयी भएकी हुन् । भुसाललाई माओवादी केन्द्र, नेकपा एकीकृत समाजवादी, जसपा, राष्ट्रिय जनमोर्चा र लोसपाले समेत समर्थन गरेका थिए । पराजित एमालेकी भट्टराईले ९३ मत ल्याइन् । उनलाई एमालेबाहेक राप्रपाले समर्थन गरेको थियो ।
तत्कालीन उपसभामुख डा. शिवमाया तुम्बाहाम्फेले २०७६ साल माघ ६ गते राजीनामा दिएपछि प्रतिनिधिसभामा नयाँ उपसभामुखको निर्वाचन हुन सकेको थिएन ।
संसदको कार्यकाल नै सकिन लाग्दा भुसाल उपसभामुख निर्वाचित भएकी हुन् । कानून अध्ययन गरेकी भुसाल वरिष्ठ अधिवक्तासमेत हुन् ।
उपसभामुख संवैधानिक परिषदको सदस्यसमेत रहने व्यवस्था छ । अब संवैधानिक परिषदमा प्रधानमन्त्री शेरबहादुर देउवा, सभामुख अग्निप्रसाद सापकोटा र उपसभामुख पुष्पा भुसाल तीनजना हुनेछन् ।
अर्कोतर्फ प्रमुख विपक्षी दलका नेता केपी शर्मा ओली र राष्ट्रियसभाका अध्यक्ष गणेश तिमल्सिना छन् ।
कामु प्रधानन्यायाधीश दीपक कार्की असोजसम्म रहनेछन् । त्यसबीचमा महाअभियोगको टुंगो नलागेमा हरिकृष्ण कार्की कामु हुनेछन् ।
नेपाल प्रेस
प्रकाशित: २०७९ असार ३१ गते १६:५५
प्रतिक्रिया
सम्बन्धित खवर
