कांग्रेस बैठकमा महामन्त्रीको गुनासो–हिजो ओलीलाई गरेका प्रश्नले हामीलाई नै लखेट्दैछ

काठमाडौं । नेपाली कांग्रेसका महामन्त्री विश्वप्रकाश शर्मा र गगन थापाले एक वर्ष सरकार चलाउँदा जवाफ दिन सकिने कुनै काम नभएको भन्दै विगतमा केपी ओलीलाई गरेका प्रश्नले आफूहरुलाई लेखेट्न थालेको टिप्पणी गरेका छन् ।

केन्द्रीय कार्य समितिको बैठकमा शनिवार आफ्नो धारणा राख्ने क्रममा महामन्त्री थापाले अर्थमन्त्रालय कांग्रेले नलिनु गति भएको र अहिले सरकारका विकृतिको प्रतिरक्षा गर्न नसक्ने अवस्थामा पुगिएको बताए । उनले ओलीकै कार्यशैली पछ्याएको आरोप देउवामाथि लगाए ।

अर्का महामन्त्री विश्वप्रकाश शर्माले पनि केपी अ‍ोलीले गलत गरेको भनेर आफूहरुले प्रश्न उठाएका कतिपय विभागहरु प्रधानमन्त्री माहतहत नै राखिनु र संवैधानिक परिषद विधेयक जस्ता कुरामा सरकारका कारण आफूहरुले जवाफ दिने अवस्था नभएको बताएका थिए ।

बैठकमा थापाले भने– एक बर्ष सरकार चलाइसक्यौं । अब फेरि पनि सरकार चलाउँदा के डेलिभर गर्छाैं भन्ने प्रस्ट नभइ मत आउँदैन । हिजो ओली हुँदा सरकार कसरी चलाउँछौं हेर्नू ? भनेका थियौं । आज सरकार कसरी चलेको छ देखिएको छ ? डिफेन्स गर्ने अवस्था छैन । हामीमाथिका प्रश्नले हामीलाई लखेट्छ ।

बैठकमा उपसभापति धनराज गुरुङले सभापतिको नाकमा झिँगा बसेको भन्दै तरबार हान्ने काम केही सदस्यहरुले गरेको भन्दा देउवाले ‘खोइ मेरो नाकमा झिँगा’ भन्ने प्रश्न गरेका थिए । गुरुङले भने निदाएको बेला थाहा नहुने जवाफ दिए ।