संसदीय समितिमा बयान दिन पत्रकारहरू सिंहदरबारमा, जनार्दन र रघुनाथसँग भोलि

काठमाडौं । तत्कालीन अर्थमन्त्री जनार्दन शर्मामाथि छानविन गर्न बनेको संसदीय समितले आज पनि बयान नसक्ने भएको छ । आज बोलाइएका पूर्वअर्थमन्त्री शर्मा नआएपछि भोलि उनको बयान हुने भएको हो ।

संसदीय समितिले शर्मालाई आज बयानका लागि बोलाएको थियो । तर, ४ बज्दासम्म उनी उपस्थित भएका छैनन् । उनको बयान अब भोलि मात्र हुने समितिका एक सदस्यले बताए ।

आज अर्थमन्त्रीबारे समाचार लेख्ने पत्रकारहरूलाई सोधपुछका लागि बोलाइएको छ । अन्नपूर्ण पोष्टका दुई रिपोर्टर ३ बजे नै बयानका लागि सिंहदरबार आइपुगेका थिए । समितिका सदस्यहरू करिब सढे ३ बजेबाट मात्रै आउन थाले । ४ बज्दासम्म बैठक सुरू भएको छैन । केही सदस्यहरू आउनै बाँकी छ ।

बैठकमा ढिलाइ भएको र सांसद बैठक चलिरहेकाले पूर्वअर्थमन्त्री शर्मा आज नआउने भएका हुन् । यसैगरी यस प्रकरणका एक प्रमुख पात्र अर्थ मन्त्रालयका पूर्व नायब सुब्बा रघुनाथ घिमिरेको पनि समितिले बयान लिन बाँकी छ । आज अर्थमन्त्रीपछि उनको बयान लिने तयारी गरिएको थियो । अर्थमन्त्री भोलि मात्रै आउने भएपछि रघुनाथलाई पनि भोलि नै डाकिने भएको छ ।

अन्नपूर्ण पोष्टको समाचार अनुसार पूर्वनासु रघुनाथलाई विज्ञ भन्दै अर्थमन्त्रालयमा घुसपैठ गराएर तत्कालीन अर्थमन्त्री शर्माले बजेटमा करका दर हेरफेर गराएका थिए ।