मेयर आचार्यको प्रश्न: स्थापित व्यवसायी हुँ, सम्पत्ति विवरणमा किन आश्चर्य ?

काठमाडौं । पोखरा महानगरपालिकाका मेयर धनराज आचार्यको धनसम्पत्तिको विवरण सञ्चारमाध्यममा आएसँगै धेरैले जिभ्रो टोके । राजनीति गर्ने व्यक्तिले झण्डै आधा अर्ब रुपैयाँको धनसम्पत्ति कसरी आर्जन गरे भन्ने प्रश्न उठेको छ ।

तर, आचार्यलाई नजिकबाट चिन्नेहरुका निम्ति भने उनले देखाएको विवरण अनौठो थिएन । यथार्थमा उनी नेताभन्दा बढी व्यवसायी हुन् । दर्जनौं व्यवसायमा हात हालेका स्थापित व्यवसायी भएको हिसाबले आफ्नो सम्पत्ति विवरणमा कसैले आश्चर्य मान्नु नपर्ने बताउँछन् आचार्य ।

‘म ३० वर्षदेखि व्यवसाय गरिरहेको छु, दुई दर्जन जति संस्थामा मेरो संलग्नता छ’, उनले भने, ‘सार्वजनिक व्यक्ति भएको हिसाबले मैले केही नलुकाइ आफूसँग भएको सम्पत्तिको स्वघोषणा गरेको हुँ ।’

मेयर आचार्यको सम्पत्ति विवरणअनुसार उनी ४३ करोड ४१ लाख रुपैयाँ बराबरको प्रपर्टीका मालिक हुन् । यो अंकमा उनको भागबन्डा गर्न बाँकी पुर्ख्यौली सम्पत्ति र सुनचाँदीको विवरण समावेश छैन । उनले आफूसँग ५४ तोला सुन, ३८ तोला चाँदी र ५ तोला हीरा भएको खुलाएका छन् । यस्तै काठमाडौंमा एउटा र पोखरामा दुईवटा गरी ३ वटा घर र चारवटा गाडी छन् । शेयरमा उनको २६ करोड रुपैयाँको लगानी छ ।

आचार्यले आफ्नो सम्पत्ति विवरण भर्खरै देखाएका भने होइनन् । उनले स्थानीय चुनावको मनोनयन दर्ता गर्दा नै सम्पत्ति विवरण निर्वाचन आयोगमा बुझाएका थिए । पोखरा महानगरपालिकाको वेबसाइटमा चाहिँ त्यसलाई भर्खर अद्यावधिक गरिएको हो ।

मेयर आचार्य २०४३ सालबाट एमालेको विद्यार्थी संगठन अनेरास्ववियूमार्फत राजनीतिमा प्रवेश गरेका थिए । उनी पोखराको पृथ्वीनारायण क्याम्पसमा सभापति पनि भए । २०५८ सालसम्म उनले सक्रिय राजनीति गरे । त्यसपछि व्यवसायतिर केन्द्रित भए । २२ वर्षसम्म राजनीतिलाई दोस्रो प्राथमिकता बनाएका उनले व्यवसायमा राम्रो प्रगति गरे ।

आचार्यले युनाइटेड ग्रुप अफ अर्गनाइजेशनअन्तर्गत आफ्नो व्यवसाय अघि बढाइरहेका छन् । यस गु्रपको मातहतमा थुप्रै कम्पनीहरु छन् भने यसबाहिर पनि विभिन्न टीमसँग उनी जोडिएका छन् । कुल मिलाएर दुई दर्जन कम्पनीमा आफ्नो आवद्धता रहेको उनले बताए ।

आचार्यले पब्लिकेशन हाउस, शैक्षिक सामग्री उद्योग, रसायनिक मल, होटल, हाइड्रोपावरदेखि बैंकिङसम्म आफ्नो व्यवसायिक सञ्जाल विस्तार गरेका छन् । नारायणगढमा उनको कापी उद्योग छ भने विराटनगरमा मल उद्योग छ । यस्तै काठमाडौंमा पब्लिकेशन हाउस छ । उनी थुप्रै कम्पनीहरुका प्रमोटर, चेयरम्यान र सञ्चालक छन् ।

दुई वर्षअघिसम्म उनी काठमाडौंमै बसेर व्यवसाय हाँकिरहेका थिए । त्यसबेला उनी तत्कालीन एमालेको उद्योग वाणिज्य संगठनका केन्द्रीय अध्यक्ष थिए । आफूलाई समय र परिस्थितिले फेरि पूर्णकालीन राजनीतिमा फर्काएको बताउँछन् आचार्य ।

तत्कालीन प्रधानमन्त्री केपी शर्मा ओलीले संसद विघटन गरेपछि पार्टीमा विवाद बढ्यो । उनी माधव नेपालको गुटमा लागे । माधव नेपाल समूहले उनलाई कास्की एमालेको समानान्तर अध्यक्ष बनायो । त्यसपछि उनले जिल्ला फर्केर राजनीतिक गर्न थालेका हुन् । पोखरा महानगरको मेयरमा टिकट पाएपछि उनले सत्तारुढ गठबन्धनको समर्थनमा चुनाव जिते । एमालेका कृष्ण थापालाई आचार्यले ६ हजारभन्दा बढीको मतान्तरले हराएका थिए ।

अब व्यवसायबाट विश्राम लिएर राजनीतिमै पूरा समय दिने आचार्य बताउँछन् । आफ्नो व्यवसाय परिवारका सदस्य र टीमले सम्हालिरहेकाले आफू फ्री भएको उनको भनाइ छ ।

‘मेरा बिजनेस सबै कर्पोरेट हिसाबले चलेका छन् । मैले समय दिइरहनुपर्दैन । वर्षमा एक–दुईपटक एजीएममा जाने र नीति निर्देश दिने कुरा छुट्टै हो । अन्यथा सबै काम मेरा भाइ, छोरा र टीमका सदस्यले गर्छन्’, उनले भने ।

आफू डेढ वर्षदेखि नै व्यवसायहरुबाट अलग भइसकेको आचार्यको भनाइ छ । उनले छोरालाई पनि आफ्नो व्यवसायमा अघि बढाएका छन् । उनका छोराले भर्खरै मास्टर्सको पढाइ सिध्याएका हुन् ।

आफू कुनै व्यक्तिगत लाभको ध्येय राखेर मेयरको चुनाव नलडेको आचार्य बताउँछन् ।

‘आर्थिक रुपमा त मलाई व्यवसायमै समय दिँदा फाइदा थियो । तर, मैले देश र समाजका लागि केही योगदान दिने मनसाय राखेर राजनीतिमा फर्किएको हुँ’, उनले भने ।

मेयर भएवापत पाउने तलबभत्ता व्यक्तिगत प्रयोजनमा खर्च नगर्ने उनको नीति छ । तलबभत्तावापत आउने पैसा पार्टीलाई दिने र केही समाज सेवामा खर्च गर्ने आचार्यले सुनाए ।

के आचार्य नेपालका सबैभन्दा धनी मेयर हुन् ? उनले इन्कार गरे ।

‘मभन्दा धनी धेरै हुनुहुन्छ होला । मेरो त के छ र ! बजारभित्र बीसौं रोपनी पैतृक सम्पत्ति भएकाहरु हुनुहोला । हामी दुईचार आना भएकाहरु के धनी हुनु ?’, उनले भने ।

आचार्यले आफू आवद्ध कम्पनीहरुमा करिब १ हजारलाई रोजगार दिएको बताए ।