कांग्रेसका इञ्जिनियर चुनावी मैदानमाः देउवाका थानी, पौडेलका थापा

काठमाडौं । नेपाली कांग्रेसनिकट इञ्जिनियरहरुलाई यतिबेला चुनावको रन्को छ । कांग्रेसको शुभेच्छुक संस्था सेन्टर फर डेमोक्रेटिक इञ्जिनियर्स नेपाल ९सिडेन० को नयाँ नेतृत्वको लागि शनिबार निर्वाचन हुँदैछ ।

सिडेनको नयाँ नेतृत्व लिनका लागि दुई प्यानल चुनावी मैदानमा छन् । जसलाई कांग्रेसका दुई गुटको प्रष्ट समर्थन रहेको छ ।

सभापति शेरबहादुर देउवा समूहको उम्मेदवारका रुपमा ई।उमेश थानी अध्यक्षको प्रत्याशी बनेका छन् । त्यस्तै वरिष्ठ नेता रामचन्द्र पौडेलको समूहबाट ध्रुव थापा अध्यक्षको उम्मेदवार रहेका छन् ।

अध्यक्षका दुवै प्रत्याशीले प्यानल नै बनाएर प्रतिस्पर्धा गर्न लागेका हुन् । थानीको प्यानलबाट उपाध्यक्षमा सूर्यबहादुर पाण्डे, महासचिवमा प्रेमचन्द्र राय, उप महासचिवमा विरेन्द्र खड्का र कौशल कार्की कोषाध्यक्षको उम्मेदवार बनेका छन् ।

त्यस्तै थापा नेतृत्वको प्यानलबाट उपाध्यक्षमा मन्दीप सुवेदी, महासचिवमा रोशनराज गिरी, उपमहासचिवमा सुमन पुडासैनी र कोषाध्यक्षमा श्याम दाहाल उम्मेदवार बनेका छन् । देशभरका ३ हजार ६ सय २३ जना लोकतन्त्रवादी इञ्जिनियरहरु अधिवेशनको मतदाता रहेका छन् ।

आफूनिकट प्यानललाई जिताउन कांग्रेस नेताहरुले भेटघाट तीव्र पारेका छन् । नयाँ नेतृत्व चयनका लागि बागमती प्रदेश बाहेकका प्रदेशहरुको प्रदेश राजधानी र बागमती प्रदेशको हकमा काठमाडौंमा मतदान केन्द्र तोकिएको छ ।

नेतृत्वका लागि प्रतिस्पर्धामा रहेका दुवै प्यानलले आ–आफ्ना प्रतिवद्धता पत्र सार्वजनिक गरेका छन् ।

अध्यक्षका उम्मेदवार थानीले इञ्जिनियरिङ शिक्षाको गुणस्तर बृद्धि, विगतका सकरात्मक कामहरुको निरन्तरता, कार्यालयर्ला प्रविधिमैत्री बनाउने, सदस्यहरुलाई तालिम र रोजगारीको अवसर लगायतका १४ बुँदे प्रतिबद्धता पत्र सार्वजनिक गरेका छन् ।

अर्का प्रत्याशी थापाले भिडियो प्रतिबद्धता सार्वजनिक गरेका छन् ।

नेपाल इञ्जिनियर एसोसियसनको पूर्व अध्यक्षसमेत रहेका थापाले इञ्जिनियरहरुको हकहितको रक्षा, इञ्जिनियरहरुको पेशागत सुरक्षा र क्षमता अभिवृद्धि तथा सिडेनको संस्थागत सुधारको प्रतिबद्धता जनाएका छन् ।