एउटै तहका कर्मचारीको समान तलब बनाउन पूर्वमुख्य सचिव पौड्यालको नेतृत्वमा समिति गठन

काठमाडौं । सरकारले एउटै तहका कर्मचारीको तलब समान बनाउनका लागि पूर्वमुख्य सचिवको संयोजकत्वमा उच्चस्तरीय अध्ययन समिति गठन गरेको छ । सोमबार बसेको मन्त्रिपरिषद बैठकले पूर्व मुख्यसचिव लिलामणि पौड्यालको संयोजकत्वमा ३ सदस्यीय समिति गठन गरेको एक मन्त्रीले नेपाल प्रेसलाई जानकारी दिए ।

चालु आर्थिक वर्षको बजेटमा सरकारले कर्मचारीको तलब १५ प्रतिशतका दरले तलब बढाए पनि समान पदको तलब समान नभएको भन्दै अर्थमन्त्रालयले माथिल्लो पदका निजामती कर्मचारीको तलब २३ प्रतिशतसम्म बढाउने तयारी गरेको थियो ।

यद्यपि त्यसको विरोधमा तल्लो तहका कर्मचारी आन्दोलनमा उत्रिएपछि अर्थमन्त्री जनार्दन शर्माले तलबमान निर्धारणका लागि समिति गठन गर्ने आश्वासन दिएका थिए । त्यसै आश्वासनअनुसार अहिले समिति गठन गरिएको ति मन्त्रीले बताए ।

निजामती सेवाका राजपत्रांकित श्रेणीका कर्मचारी र नेपाल प्रहरीका राजपत्रांकित श्रेणीका कर्मचारी तलबमा तीनदेखि ५ हजारसम्मको अन्तर छ । पौडेलको संयोजकत्वमा गठित समितिलाई यसरी समान पदमा अन्तर भएको तलब समान बनाउनका लागि अध्ययन गर्ने र सिफारिस गर्ने जिम्मेवारी दिइएको हो ।