एमालेमा फर्किएका गुल्मीका दुई नेतालाई नेकपा एसले साधारण सदस्यबाट हटायो

रूपन्देही । सोमबार गुल्मीमा नेकपा एसका दुई केन्द्रीय सदस्य, जिल्ला इन्चार्ज तथा अध्यक्षसहितको टोलीले एमालेसँग एकता घोषणा गरेको विषयमा सो पार्टीले आपत्ति जनाएको छ ।

नेकपा एस जिल्ला संगठन समितिले विज्ञप्ति निकालेर पदीय दुरूपयोग गरी एमालेसँग एकता भयो भनी कुप्रचार गरेको भन्दै गणेश खनाल र नरेश भण्डारीलाई साधारण सदस्यसमेत नरहने गरी कारबाही गरेको जनाएको छ । उनीहरूले एमालेसँग एकता घोषणाको कुप्रचार गरेको विज्ञप्तिमा लेखिएको छ ।

खनाल र भण्डारीबाहेक संस्थापक अध्यक्ष श्रीराम महतसहित सिंगो पार्टी एकढिक्का रहेको नेकपा एसले दाबी गरेको छ ।

‘दुईजना व्यक्तिलाई टीका लगाएर एमाले पार्टी प्रवेश गरेको विषयलाई एकताको घोषणाजस्तो नाटक गरिनु खेदजनक छ । यस्ता प्रकारका गैरराजनितिक चरित्र प्रर्दशन गरी भ्रम सिर्जना नगर्न सम्बन्धित पार्टीलाई सचेत गराउन चाहन्छौं’, विज्ञप्तिमा उल्लेख छ ।

एमाले पार्टी कार्यालयमा एकीकृत समाजवादी र एमालेबीच पार्टी एकताको घोषणासभा भएको थियो । सोमबार केन्द्रीय सदस्य तथा जिल्ला अध्यक्ष बनेका नरेश भण्डारी, केन्द्रीय सदस्य तथा जिल्ला इन्चार्ज गणेश खनालसहितका अधिकांश नेता सोमबार एमालेमा फर्किए । उनीहरूलाई एमाले उपमहासचिव प्रदीप ज्ञवाली, सचिव गोकर्ण विष्टले स्वागत गरेका थिए ।

नेकपा एस प्रदेश कमिटी सदस्य हिमाल थापा, युवासंघ केन्द्रीय सदस्य तथा पार्टी जिल्ला सचिवालय सदस्य मदन विष्ट, जिल्ला सदस्य तथा मुसिकोट अध्यक्ष मदनदीप घिमिरे, जिल्ला सदस्य हरि कुँवर, विष्णुप्रसाद भण्डारी, युवासंघ जिल्ला अध्यक्ष रामुजंग कंडेल, नेकपा एसको विद्यार्थी जिल्ला अध्यक्ष नीलकण्ठ पाण्डे, छत्रकोट कमिटीका अध्यक्ष यमबहादुर खत्री पनि एमालेमा प्रवेश गरेका थिए ।