केपी ओलीमाथि प्रचण्डको आरोप: भ्रष्टाचार गर्दिनँ र गर्न दिन्नँ भनेर बोर्ड टाँग्ने, भित्र भ्रष्टाचारबाहेक केही नगर्ने (भिडिओ)

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेका अध्यक्ष केपी शर्मा ओलीले बाहिर भ्रष्टाचार गर्दिनँ भने पनि भित्रभित्रै भ्रष्टाचारबाहेक अरु केही नगर्ने आरोप लगाएका छन् ।

पार्टी निकट नेपाल उद्योग व्यापार महासंघको प्रथम केन्द्रीय महाधिवेशनलाई सम्बोधन गर्दै उनले भने, ‘‘कैयौं प्रधानमन्त्रीले भन्ने गरेको तपाईं हामीले सुनेका छौं, म भ्रष्टाचार गर्दिनँ, गर्न पनि दिन्नँ भन्ने साइनबोर्ड बाहिर टाँग्ने र त्यो साइनबोर्डभित्र बसेर भ्रष्टाचारबाहेक केही नगर्ने ।’

यस्तो हुनुको कारण व्यवस्थामै खोट रहेको उनको भनाइ छ । ‘के कारणले भयो यस्तो ? यो व्यक्तिको मात्र दोष हो कि यो प्रणालीमा कहीं खोट छ भन्ने कुरा हामी सबैले विचार गर्नुपर्ने विषय हो’, उनले भने ।

यस्तै ओलीलाई नै लक्षित गरी अध्यक्ष प्रचण्डले माओवादी, गणतन्त्र, समावेशी र समानुपातिक पद्धतिसँग उनी असन्तुष्ट रहेको टिप्पणी गरे । उनले भने, ‘एकथरि मानिसहरूलाई त माओवादी, गणतन्त्र, समावेशी, समानुपातिक सबैले अधिकार पाउनुपर्‍यो भन्ने कुरा नै मन पर्दैन । प्रचण्ड भनेपछि अस्थिरताको कारण हो भन्नेहरु पनि छन् ।’

तर, आफू रहुञ्जेल प्रतिक्रियावादी शक्तिको चाहना पूरा नहुने उनको दाबी थियो ।