बजेट अभावले ‘मुख्यमन्त्री ग्रामीण सडक सुधार कार्यक्रम’ रोकियो

विराटनगर । बजेट अभावमा प्रदेश १ सरकारको महत्वाकांक्षी याेजना ‘मुख्यमन्त्री ग्रामीण सडक सुधार कार्यक्रम’को काम रोकिएको छ । बजेट अभावकै कारण कार्यक्रम अन्तर्गतका ८७ वटा सडकको निर्माणसँगै स्तोन्नतीको काम प्रभावित भएको जनाइएको छ ।

‘मुख्यमन्त्री ग्रामीण सडक सुधार कार्यक्रम’ नाम दिएको योजनाका लागि शुरुको वर्षमा ४० करोड रुपैयाँ विनियोजन गरिएको थियो । कार्यक्रम सञ्चालनका लागि प्रदेश सरकारले प्रत्येक निर्वाचन क्षेत्रमा एक-एक वटा आयोजना छनोट गरेको थियो । शुरु भएका योजनाका काम पनि बजेटकै कारण रोकिएको प्रदेशको भौतिक पूर्वाधार विकास मन्त्रालयले जनाएको छ ।

मन्त्रालयका सूचना अधिकारी ओमप्रकाश साहले सरकारले नै चालु आर्थिक वर्षमा बहुवर्षे सडक आयोजनाको काम अघि नबढाउन निर्देशन दिएकाले काम रोकिएको बताए । सरकारले कार्यक्रमका लागि अहिलेसम्म बजेट विनियोजनसमेत नगरेको साहले बताए ।

पूर्वाधार विकास कार्यालय विराटनगरका प्रमुख राजनराज रेडीका अनुसार भौतिक पूर्वाधार विकास मन्त्रालयले चालु आर्थिक वर्षमा योजनाहरुको काम अघि नबढाउन निर्देशन दिएकाले सडक निर्माण रोकिएको हो ।

चालु आर्थिक वर्षको आठ महिना बित्न लाग्दा पनि सरकारले उक्त सडक योजनाहरुका लागि बजेटको व्यवस्था गर्न सकेको छैन ।

साहका अनुसार अघिल्लो आर्थिक वर्षमा ८६ वटा सडकका लागि ४० करोड बजेट विनियोजन भएको र त्यही अनुसार काम पनि भएको तर सरकारले २८ करोड १० लाख मात्रै भुक्तानीका लागि बजेट उपलब्ध गराएको बताए ।

मुख्यमन्त्री ग्रामीण ससडकअन्तर्गत अघिल्लो आर्थिक वर्षमा सम्झौता भएका प्रदेश १ का सडकमा १३ किलोमिटर कालोपत्रे, ५ किलोमिटर ग्राभेल भएको छ । त्यस्तै ५ किलोमिटर ग्राभेल सडकको काम भएको थियो ।

अघिल्लो आर्थिक वर्षमा १ सय ६५ किलोमिटर कच्ची सडक सुधार, नाला निर्माण ३ किलोमिटर र १ हजार ८ सय ३८ घनमिटर तारजाली लागाउने काम सम्पन्न भएको छ ।

सरकारले चालु आर्थिक वर्षमा कार्यक्रमका लागि ५ अर्ब २१ करोड २३ लाख बजेट विनियोजन गरेको छ ।

कोराना संक्रमणका कारण बजेट प्रभावित हँुदा बहुवर्षिय योजना पनि सञ्चालनका लागि बजेट अभाव छ । बजेट अभावका कारण प्रदेश गौरवको योजना घिनाघाट–बिराटचौक सडकको भुक्तानी दिन नसक्दा ठेकेदारहरुले एक महिनादेखि निर्माणको काम रोकेका छन् ।