युवकसहित होटल छिरेकी युवतीको जलेर मृत्यु, हत्या कि आत्महत्या अन्योलमा प्रहरी

काठमाडौं । काठमाडौंको नक्सालस्थित होटल क्राउन प्लाजामा गत साता युवकसहित कोठा छिरेकी युवतीको जलेर मृत्यु भएको घटनामा प्रहरीले दुई जनालाई पक्राउ गरेपनि हत्या की आत्महत्या भन्ने अझै टुंगोमा पुग्न सकेको छैन ।

असोज २४ गते दिउँसो चाबहिलकी २३ वर्षीय युवती र बाराको सिमराका केशव रिजाल होटल क्राउन प्लाजाको कोठा बुक गरेर बसेका थिए । उनीहरु कोठा प्रवेश गरेको करिब एक घण्टापछि चिच्याएको आवाज सुनिएपछि होटलका कर्मचारीले कोठा खोलेर हेर्दा युवतीको शरिरमा आगो दन्किरहेको भेटिएको थियो ।

त्यसपछि तत्कालै वीर अस्पताल पुर्‍याइए पनि त्यहाँबाट कीर्तिपुरस्थित बर्न सेन्टरमा रिफर गरिएको थियो । असोज २५ गते उपचारका क्रममा ती युवतीको मृत्यु भएको थियो । प्रहरीले युवतीसँगै कोठामा रहेका युवक र होटलका एक स्टाफलाई नियन्त्रणमा लिएर अनुसन्धान गरिरहेको छ । स्रोतका अनुसार युवती जलिरहेको स्थानमा पेट्रोल पनि भेटिएको थियो । उनीहरु दुईवटा झोला लिएर होटलमा प्रवेश भएको पाइएको छ । काठमाडौं प्रहरी परिसर प्रवक्ता दिनेशराज मैनालीले घटनाबारे अनुसन्धान भइरहेको बताए ।

‘आत्महत्या की हत्या भनेर अहिले भन्न सक्ने अवस्था छैन । युवक र मृतक युवतीबीच पुरानो चिनजान रहेको पाइएको छ’, एसपी मैनालीले भने । होटलका कर्मचारीले प्रहरीलाई जानकारी नदिइकन उपचारका लागि लगेको र त्यसपछि पनि प्रहरीलाई खबर नगरेकाले नियन्त्रणमा लिइएको बताए ।