लुम्बिनीमा यी हुन् प्रतिनिधिसभा र प्रदेशसभाका एमाले उम्मेदवार (सूचीसहित)

नेपाल प्रेस

२०७९ कार्तिक ३ गते १३:५८

रुपन्देही । नेकपा एमालेले लुम्बिनीमा रहेका २६ संघीय निर्वाचन क्षेत्रमा २२ र प्रदेशका ५२ क्षेत्रमध्ये ४७ निर्वाचन क्षेत्रमा आफ्ना उम्मेदवार खडा गरेको छ । यसअघि प्रदेशसभामा बहुमत २८ सीट ल्याएको एमालेका लागि यसपटक विरासत जोगाउन चुनौती छ ।

पाँच वर्षअघि गठबन्धनमा रहेको माओवादी केन्द्र र पार्टीमै रहेको एउटा समूह नेकपा एस बनेर कांग्रेससँग गठबन्धनमा गएकाले एमालेलाई प्रदेश सभामा बहुमत जुटाउन संकट छ । यद्यपि एमालेका लुम्बिनी प्रदेश अध्यक्ष राधाकृष्ण कंडेल भने प्रत्यक्षमा आधा सीट जित्ने दाबी गर्छन् ।

एमालेले संघका २६ मध्ये राप्रपालाई रुपन्देही ३ र बाँके २ छाडेको छ जसपालाई रुपन्देही ४ छोडेको छ भने हृदयेश त्रिपाठीको जनता प्रगतिशीललाई नवलपरासी १ छाडेर २२ क्षेत्रमा उम्मेदवारी दिएको छ ।

५२ वटा प्रदेशसभा सीटमध्ये केहीमा भने राप्रपा र जसपासँग तालमेल गरेको छ । प्रदेशका तीन सीट राप्रपा, दुई सीट जसपालाई छाडेको छ । एमाले प्रदेश अध्यक्ष कंडेलका अनुसार राप्रपालाई रुपन्देहीको १ को १, ३ को १ र बाँकेको १ को १ तथा जसपालाई रुपन्देही ४ का २ र पश्चिमनवलपरासीको २ को २ दिएर अन्य ४७ सीटमा एमालेका उम्मेदवार मैदानमा छन् ।

एमालेबाट लुम्बिनीको सम्भावित मुख्यमन्त्री लीला गिरी हुन् । गिरी पार्टी पोलिटब्यूरो सदस्य तथा प्रदेशको सहइन्चार्ज हुन् । अहिले प्रदेशमा उम्मेदवार बनेकामध्ये उनी सिनियर नेतामा पर्दछन् । नेताहरूले उनलाई ग्रिन सिग्नल दिएको भनिएपनि उनले गिरी आफैले त्यो विषय निर्वाचनपछिको कुरा भएको बताउँछन् । नेकपाकालमा उनी प्रदेश कमिटी अध्यक्ष बनेका थिए । उनीसँगै प्रदेश उपाध्यक्ष तथा पूर्वमन्त्री भोजप्रसाद श्रेष्ठ, नेता दधिराम न्यौपाने, दाङका घनश्याम पाण्डे मुख्यमन्त्रीका लागि संभावित उम्मेदवार हुन् ।

लुम्बिनीमा संघीय सांसद बनिसकेका नेताहरु भने प्रदेशमा उम्मेदवार बनेका छैनन् ।

नेकपाकालमा माओवादीबाट एमालेमा रहेकामध्ये सचिव टोपबहादुर रायमाझी अर्घाखाँचीबाट, रोल्पाबाट पूर्वमाओवादी कमाण्डर पूर्णबहादुर बुढामगर र रुकुमपूर्वबाट कैलासकुमार मल्ल प्रतिनिधि सभामा उम्मेदवार बनेका छन् भने प्रदेशसभामा रुपन्देहीमा दधिराम न्यौपाने, गुल्मीमा दिनेश पन्थी, बाँकेमा दुर्गाप्रसाद थारु उम्मेदवार बनेका छन् ।