देव गुरूङको आव्हान- चुनावपछि गठबन्धनकै सरकार बन्छ, ढुक्कसँग मतदान गर्नुस्

लमजुङ । नेकपा माओवादी केन्द्रका महासचिव तथा लमजुङबाट प्रतिनिधिसभामा गठबन्धन उम्मेदवार देव गुरूङले लमजुङमा गठबन्धनको जित सुनिश्चित रहेको दाबी गरेका छन् ।

गठबन्धनको लमजुङ-काठमाडौं सम्पर्क समन्वय समिति र मञ्चले काठमाडौंमा आयोजना गरेको चुनावी कार्यक्रममा उनले राजनीतिक स्थिरता, सुशासन, लमजुङको विकास र समृद्धिको लागि गठबन्धनले जित्न आवश्यक रहेको बताए ।

उनले भने, ‘हामीले हाम्रो उमेदवारी फगत निर्वाचन जित्नको लागि मात्रै नभएर लमजुङको विकास र समृद्धिको लागि दिएका हौं । सुशासनसहितको विकास र बजार व्यवस्थासहितको उत्पादन प्रणालीमार्फत जनताको आर्थिक समृद्वि नै मुख्य एजेण्डा हुन् ।’

उनले त्यसको लागि कृषिमा यान्त्रीकरण, भएका सडक कालोपत्रे, नयाँ सडक विस्तार गरी उत्पादन केन्द्रसम्म पुर्‍याउने र पर्यटन तथा जलविद्युतका सम्भावनालाई अत्यधिक मात्रामा उपयोग गर्ने पनि आफ्नो योजना सुनाए ।

गठबन्धन यो चुनावसम्म मात्रै नभएर सरकार निर्माण, संविधान रक्षा र शान्ति प्रक्रियाको पूर्णताको लागि पनि आवश्यक रहेकाले ढुक्कसँग मत दिन मतदातासँग गुरुङको आग्रह छ ।

कार्यक्रममा नेपाली कांग्रेसका नेता दीलबहादुर घर्तीले ओली मण्डलीले संविधान मिच्ने र निरंकुशता लाद्ने प्रयास गरेकाले माओवादीसहितको गठबन्धन बनेकाले संविधानको रक्षा र लमजुङको विकास र समृद्धिको लागि गठबन्धनका उमेदवारलाई ढुक्कसँग भोट दिएर जिताउन कांग्रेससहित सबै दलका कार्यकर्ता र मतदातालाई आग्रह गरे ।

उनले देव गुरूङ जस्तो नेतालाई आफूहरूले साझा उमेदवारको रूपमा प्रान्त गर्नु लमजुङको लागि गौरवको विषय भएको बताए ।

कार्यक्रममा नेकपा एकीकृत समाजवादीका जिल्ला अध्यक्ष रामबाबु अधिकारीले गठबन्धनका दलहरूबीचमा कुनै समस्या नभएको बताए । उनले प्रतिद्वन्दी दल एमालेमा गम्भिर विवाद र असहमति देखिएकाले गठबन्धनका उम्मेदवारहरूको जित सुनिश्चित रहेको दाबी गरे ।