एमालेको आरोप- प्रदीप पौडेल राजनीतिक बहसबाट भागेर गिरोह शैलीमा चरित्रहत्याको खेती गर्दैछन्

काठमाडौं । नेकपा एमालेले काठमाडौं ५ का गठबन्धन उम्मेदवार प्रदीप पौडेल राजनीतिक प्रतिस्पर्धा गर्न नसकेपछि गिरोह शैलीमा अनर्गल प्रचारमा उएिके भन्दै खुला छलफल र बहसमा आउन चुनौती दिएको छ ।

एमाले क्षेत्र नम्बर ५ निर्वाचन परिचालन कमिटी संयोजक शान्ति अधिकारीले प्रेस विज्ञप्ति जारी गर्दै गठबन्धन उम्मेदवारले आफ्ना एजेण्डा प्रस्तुत गर्नुको साटो गिरोह शैलीमा प्रतिस्पर्धी उम्मेदवारविरुद्ध भ्रमपूर्ण, अप्रमाणिक र कहिल्यै प्रमाणित हुन नसक्ने निकृष्ट लाञ्छनायुक्त अभिव्यक्ति दिइरहेको बताएकी छन् ।

विज्ञप्तिमा भनिएको छ, ‘कतै अभियोजन नभएका र कहिल्यै प्रमाणित हुन नसक्ने यस्ता निकृष्ट लाञ्छानाको खेती बन्द गर्न र राजनीतिकरूपमा प्रस्तुत हुन हामी सत्ता गठबन्धनलाई आग्रह गर्दछौं । हामी विकास, समृद्धि तथा योजना र संकल्पका बारेमा आफ्ना मुद्दामा खुला छलफल र बहस गर्न सदैव तप्तर छौं ।’

सो क्षेत्रमा एमालेबाट वरिष्ठ उपाध्यक्ष ईश्वर पोखरेल उम्मेदवार छन् भने गठबन्धनबाट कांग्रेसका नेता प्रदीप पौडेल छन् । पौडेलले राजनीतिक प्रतिस्पर्धा गर्न नसकेर फेक आईडीहरूमार्फत पोखरेलको चरित्रहत्या गराएको आरोप एमालेको छ ।