लमजुङमा देव गुरुङलाई समर्थन गर्दै कांग्रेस बीपीका पौडेलद्वारा उम्मेदवारी फिर्ताको घोषणा

लमजुङ । नेपाली कांग्रेस (बीपी) बाट प्रतिनिधिसभा सदस्य उम्मेदवार डा. लक्ष्मीकान्त पौडेलले उम्मेदवारी फिर्ता लिएको घोषणा गरेका छन् । आइतबार बेंसीशहरमा पत्रकार सम्मेलन गर्दै उनले गठबन्धनबाट माओवादी उम्मेदवार देवप्रसाद गुरुङलाई समर्थन गरेको जानकारी गराए ।

गठबन्धनका शीर्ष नेताहरुसँग छलफल गरी प्रतिगमनकारी शक्तिलाई परास्त गर्न उम्मेदवारी फिर्ता लिएको पौडेलले बताए । यद्यपि, निर्वाचन आयोगले तोकेको समयभित्र उम्मेदवार फिर्ता नभएकाले उनको उम्मेदवारी कायमै रहनेछ ।

पौडेलले नेपाली कांग्रेसले गठबन्धन गरेर सबै क्षेत्रमा उम्मेदवारी नदिएको, द्वन्द्वकालका घटनाको निष्पक्ष तबरबाट छानबिन नभएको लगायतका एजण्डासहित उम्मेदवारी दिएका थिए ।

लमजुङको विकासका लागि गठबन्धन उचित रहेका ठहर भएकाले राष्ट्रियता, लोकतन्त्रको रक्षाका लागि लागेको उनको भनाइ छ । उनले नेपाली कांग्रेस (बीपी) पार्टीको केन्द्रीय सदस्यबाट पनि राजीनामा दिएको घोषणा गर्दै कांग्रेसमै रहने बताए ।