नियमावली संशोधन गरेर चुनावको मुखमा फेरि अर्को लाइसेन्स बाँड्दै उद्योगमन्त्री बडू

काठमाडौं । चुनावको मुखैमा उद्योगमन्त्री दिलेन्द्र बडूले गुट्खा उत्पादनका लागि नयाँ लाइसेन्स दिन काम सुरू गरेका छन् । मन्त्रिपरिषद्‍बाट पहिले नै निर्णय भएको भन्दै चुनावको मुखमा नयाँ लाइसेन्स वितरण हुन लागेको हो ।

सीमित बिचौलिया र व्यापारिक घरानासँगको मिलेमतोमा पछिल्लो समय बलियो बन्दै गएको वित्तीय गठबन्धनको निरन्तरता स्वरूप गुट्खाको लाइसेन्स दिइन लागिएको स्रोतले बतायो ।

विशेष आर्थिक क्षेत्र (सेज) मा मदिरा, हातहतियार, विष्फोटक पदार्थ र गुट्खालगायत सुर्तीजन्य उद्योग स्थापना गर्न नपाइने व्यवस्था छ । तर, उद्योगमन्त्रालयको अग्रसरतामा सरकारले नियम नै संशोधन गरेर सेजभित्र गुट्खा उत्पादनका लागि एक उद्योगलाई अनुमति दिने अन्तिम तयारीमा उद्योग मन्त्रालय रहेको छ ।

चुनवाको आचारसंहिता लागू हुनुपूर्व नै उद्योग मन्त्रालयको प्रस्तावमा मन्त्रिपरिषद्ले सेजमा गुट्खा उद्योग खोल्न पाउने निर्णय गरेको थियो ।

पी के श्री इन्ड्रष्ट्रिज प्रालिलाई सेजभित्र गुट्खा उत्पादन गर्न अनुमति दिने अन्तिम तयारी भएको छ । उद्योगमन्त्रालयले यसका लागि काम गर्दैछ । आज नै लाइसेन्स दिनको लागि मन्त्रालयमा बैठक डाकिएको छ ।

उद्योग मन्त्रालयका एक कर्मचारीले भने, ‘आज सेजमा गुट्खा उद्योगलाई सेजभित्र उद्योग खोल्न दिनको लागि बैठक बस्दैछ । मन्त्रालयमा सेजभित्र गुट्खा उद्योग खोल्ने निर्णयप्रति असन्तुष्टिका बीच नियमावली नै संशोधन गरेर लाइसेन्स दिनको लागि नै आज बैठक बस्न लागेको हो ।’

मन्त्रालयको निर्णयपछि त्यो फाइल उद्योग विभाग पुग्नेछ ।

पीकेश्रीले उद्योग स्थापना गर्न राजस्वसमेत तिरिसकेको छ । राजनीतिक पहुँचका कारण पनि अब सरकारले गुट्खा उत्पादनको लागि अनुमति दिनेमा उद्योग सञ्चालक निश्चिन्त छन् ।

गुट्खा उद्योग सञ्चालनका लागि उद्योग, वाणिज्य तथा आपूर्ति मन्त्रालयले सेजको नियमावली नै संसोधन गरेको छ । सेजमा स्थापना गर्न नपाइने उद्योगहरूको सूची संशोधन गरेर गुट्खा, मदिरा र सुर्तीजन्य उद्योगलाई समेत अनुमति दिने तयारी भएको थियो । तर, अहिलेका लागि गुट्खा उद्योगको मात्र लाइसेन्स दिन लागिएको हो ।

विदेश वस्तु निर्यात गर्नको लागि भनेर स्थापना भएको सेजमा उद्योगले करदेखि जग्गा र भवनको भाडासम्ममा छुट दिने गरेको छ । नियमावली संशोधन गरेर गुट्खा उत्पादन गर्न दिइए यस्ता उद्योगले पनि यी सहुलियत र छुट पाउनेछन् ।

उद्योग विभागका महानिर्देशक रामचन्द्र तिवारीलाई सेजनमा गुट्खा खोल्ने विषय विभागको नभएको बताए ।

उनले भने, ‘मैले पनि सुनेको मात्रै हो । विभागमा कुनै फाइल आएको छैन । निर्णय भएर आयो भने हामीले काम गर्ने हो । तर, विभागले सुरुमा नै अनुमति दिने हैन ।’

भैरहवा र सिमरामा सेजको उद्योग स्थापना गर्ने प्लटहरू रहेका छन् । सरकारले मदिरा र सुर्ती तथा गुट्खाजन्य वस्तुको उत्पादन सेजमा नै गर्न दिने भन्ने भएपछि प्लटहरूको भाडा सम्झौता भइरहेको छ ।

यसअघि मन्त्री बडूले निर्वाचनको मिति घोषणासँगै रक्सी उद्योगको लाइसेन्स बाँडेका थिए । चुनाव खर्च उठाउन आफू निकटस्थ उद्योगीलाई रक्सीको नयाँ लाइसेन्स र पुँजी वृद्धि वितरण निर्णय गरेको उनीमाथि आरोप छ । सेजभित्र गुट्खा उद्योगको लाइसेन्स वितरणमा पनि ठूलो आर्थिक चलखेल भएको बताइएको छ ।

रक्सीको नयाँ लाइसेन्स वितरण ८ वर्षदेखि रोकिएको थियो । लगानी गर्न धेरै लगानीकर्ताहरू इच्छुक रहेको भन्दै उद्योग विभागमा आवेदनहरू थुप्रिएका छन् । तर मन्त्री बडू र उद्योग विभागका महानिर्देशक रामचन्द्र तिवारीले स्वार्थ मिल्नेलाई मात्र लाइसेन्स वितरण गरेको आरोप छ ।

चुनावपछि मात्रै सार्वजनिक गर्ने शर्त !

दसैं बिदा अघि नै राजस्व अनुसन्धानले ८ ट्रक सुपारीको सील नै नखोली छाडिदिएको थियो । तर, त्यो कुरा गोप्य राखेर दसैंपछि मात्रै सार्वजनिक भएको थियो । अहिले पनि चुनाव अघि नै सेजमा गुट्खाको उद्योग खोल्न लाइसेन्स दिएर चुनावपछि मात्रै सार्वजनिक गर्न गर्ने तयारी रहेको छ ।