प्रदेशमा घन्टी नहुँदा काठमाडौंमा राप्रपालाई फलिफाप: प्रत्यक्षमा ५ सीट, समानुपातिकको अग्रतामा दोस्रो

काठमाडौं । काठमाडौंको प्रतिनिधिसभा चुनावमा घन्टीको ओझेलमा परेको राष्ट्रिय प्रजातन्त्र पार्टीले प्रदेशसभा चुनावमा भने उत्साहजनक प्रदर्शन गरेको छ । अघिल्लो निर्वाचनमा काठमाडौंमा प्रत्यक्षतर्फ ‘नील’ रहेको राप्रपा (तत्कालीन राप्रपा नेपाल) ले यसपालि प्रदेशसभामा पाँच सीट जित्दै सुखद नतिजा ल्याएको हो ।

काठमाडौंको क्षेत्र नं २ (१) र २ (२) मा राप्रपाका उम्मेदवारहरु विजयी भएका छन् । २ (१) मा सुनिल केसीले हिजो जीत हासिल गरेका थिए । आज राति सकिएको २ (२) को मतगणनामा राजु विष्ट विजयी भएका छन् । यसैगरी क्षेत्र नम्बर ५ (१) मा राप्रपाका राजेन्द्र प्रजापति, ८ (२) मा उद्धव थापा र क्षेत्र नम्बर ९ (१) मा नुरज बज्राचार्य विजयी बनेका छन् ।

अघिल्लो चुनावमा राप्रपा नेपालले प्रत्यक्षतर्फ संघीय र प्रदेशसभा दुवैमा एक सीट पनि जित्न सकेको थिएन । यसपालि पार्टीमा नेतृत्वको अनुहार फेरिएसँगै काठमाडौंवासीमा यस पार्टीप्रति आकर्षण देखिएको छ । प्रतिनिधिसभातर्फ कुनै सीट जित्न नसके पनि प्रदेशसभामा राप्रपाले कांग्रेस र एमालेपछि तेस्रो सर्वाधिक सीट जितेको हो ।

प्रतिनिधिसभाको प्रत्यक्ष र समानुपातिकमा राप्रपालाई राष्ट्रिय स्वतन्त्र पार्टीले ठूलो असर पुर्‍याएको छ । तर, सो पार्टीले प्रदेशसभा चुनावमा भाग नलिँदा त्यसको फाइदा राप्रपालाई मिलेको देखिन्छ । प्रतिनिधिसभामा स्वतन्त्र पार्टीलाई भोट दिने धेरैले प्रदेशमा राप्रपा रोजेका छन् । काठमाडौं २ मा स्वतन्त्र पार्टी विजयी हुँदा दुवै प्रदेशमा राप्रपाका उम्मेदवार जित्नुले त्यही संकेत गर्छ ।

राप्रपाका प्रवक्ता मोहन श्रेष्ठ स्वतन्त्र पार्टीले यस आम चुनावमा राप्रपालाई असर पुर्‍याएको स्वीकार्छन् । उनले भने, ‘खासगरी समानुपातिकतर्फ राप्रपालाई आउन सक्ने सम्भावित मतको ठूलो हिस्सा घन्टीमा गएको देखिन्छ ।’

प्रदेशमा घन्टीका उम्मेदवार नहुँदा पार्टीलाई फाइदा भएको हो भन्ने प्रश्नमा उनले भने, ‘घन्टीले हामीलाई प्रतिनिधिसभामा प्रत्यक्ष र समानुपातिक दुवैतर्फ असर गरेको छ । संघमा घन्टीलाई हाल्नेले प्रदेशमा हामीलाई हालेको काठमाडौंमा देखिन्छ ।’

समानुपातिकतर्फ हालसम्मको मतगणनाले पनि यसलाई पुष्टि गर्छ । प्रतिनिधिसभाको समानुपातिकतर्फ काठमाडौंमा स्वतन्त्र पार्टी एक नम्बरमा रहेको छ भने राप्रपा पाँचौंमा छ । तर, प्रदेशसभातर्फ भने कांग्रेसपछि राप्रपा दोस्रो स्थानमा छ ।

अहिलेसम्मको गणनामा प्रदेश समानुपातिकतर्फ काठमाडौंमा कांग्रेसले ५५१७ मत ल्याउँदा राप्रपालाई ५२५५ मत आएको छ । तेस्रो स्थानमा एमालेले ४९६६ मत ल्याएको छ ।

समग्र बाग्मती प्रदेशमा राप्रपाले तेस्रो सर्वाधिक मत ल्याइरहेको छ । अहिलेसम्मको गणनामा बाग्मती प्रदेशमा एमालेले सर्वाधिक ३१ हजार ७२६ ल्याउँदा कांग्रेसले २९ हजार ८४३ र राप्रपाले १७ हजार ६५३ मत ल्याएका छन् ।

प्रदेशसभाको समानुपातिकतर्फ समग्रमा भने राप्रपा पाँचौं स्थानमा छ । राप्रपाभन्दा अगाडि एमाले, कांग्रेस, रास्वपा र माओवादी छन् । अहिलेसम्मको रुझान हेर्दा राप्रपाले समानुपातिकमा ३ प्रतिशत मत कटाएर राष्ट्रिय पार्टीको हैसियत फर्काउनेमा नेताहरु आशावादी देखिएका छन् ।

अघिल्लो चुनावमा निराशाजनक परिणाम भोगेको राप्रपा नेपालले राष्ट्रिय पार्टीको हैसियत गुमाएको थियो । प्रत्यक्षतर्फ प्रतिनिधिसभामा सो पार्टीले एक सीटमात्र जितेको थियो भने समानुपातिकमा ३ प्रतिशत मत कटाउन सकेको थिएन ।