एमाले र माओवादी महासचिव पछाडि, चुनाव जित्न हम्मेहम्मे
काठमाडौं । प्रतिनिधिसभाको जारी मतगणनामा नेकपा एमाले र माओवादी केन्द्रका महासचिवलाई चुनाव जित्न हम्मेहम्मे पर्ने देखिएको छ ।
पछिल्लो मत परिणामअनुसार दाङ २ मा एमाले महासचिव शंकर पोखरेल र लमजुङमा माओवादी महासचिव देव गुरुङ पछि परेका हुन् ।
दाङ २ मा सत्ता गठबन्धनको तर्फबाट माओवादी केन्द्रकी रेखा शर्माको अग्रता कायम छ । सुरुवाती चरणदेखि नै अग्रता लिएकी शर्माको १४ हजार १०७ मत छ । एमाले महासचिव पोखरेलले १२ हजार २४३ मत ल्याएर पछ्याइरहेका छन् ।
यस्तै लमजुङमा माओवादी केन्द्रका महासचिव गुरुङविरुद्ध एमाले उपमहासचिव पृथ्वी सुब्बा गुरुङले अग्रता लिइरहेका छन् । पृथ्वीले २२ हजार ४३८ मत ल्याएर अग्रता कायम राख्दा देवले २२ हजार १३० मत ल्याएर पछ्याइरहेका छन् ।