क्रान्तिकारीको लेखा आयोग र कोषाध्यक्षले भने- आर्थिक चलखेल भएकै बुझिन्छ, कारबाही होस्

काठमाडौं । सीटीईभीटी र पोखरा विश्वविद्यालयको सम्बन्धन वितरणमा पैसाको ‘बार्गेनिङ’ भएको विषयमा सत्यतथ्य छानबिन गरी कारबाही गर्न अखिल क्रान्तिकारीका केन्द्रीय कोषाध्यक्ष र लेखा आयोग प्रमुखले माग गरेका छन् ।

माओवादी केन्द्रनिकटको उक्त विद्यार्थी संगठनमा अध्यक्ष पञ्चा सिंहले कलेज सम्बन्धनमा रकम ‘बार्गेनिङ’ गरेको आरोप लागेपछि संगठनभित्रको विवाद अहिले छताछुल्ल छ । केन्द्रीय लेखा आयोग प्रमुख विश्वमणि थापा र कोषाध्यक्ष भूषण शाहीले संयुक्त विज्ञप्ति निकाल्दै पछिल्लो समय संगठनभित्र उठेको आर्थिक सवालमा गम्भीर ध्यानाकर्षण भएको बताएका छन् ।

यो पनि पढ्नुस् : अखिल क्रान्तिकारीमा लफडा, पञ्चामाथि कलेजसँग सम्बन्धनमा बार्गेनिङ गरेको आरोप

‘संगठनका जिम्मेवार नेताहरूबाट सीटीईभीटी, पोखरा विश्वविद्यालयलगायत अन्य विश्वविद्यालयमा सम्बन्धन र कार्यक्रम विस्तारलाई लिएर आन्दोलनको नाममा आर्थिक लेनदेन गर्न बार्गेनिङ गरेको विषयले संगठनको आर्थिक पारदर्शिता गम्भीर प्रश्न चिह्न खडा भएको छ’, विज्ञप्तिमा भनिएको छ । कुनैपनि कमिटीमा छलफल नगरी शैक्षिक मुद्दाहरुको तय, मुद्दाहरु उठानको प्रक्रिया र सम्बन्धित निकायमा प्रारम्भिक रूपमा बुझ्दा केन्द्रको निर्देशनमा चलखेल भएकै बुझिन्छ । हामी कुनै पनि विश्वविद्यालय, कलेज र अन्य निकायबाट संस्थागत रुपमा आर्थिक गतिविधि नगर्ने निर्णय गरेको जानकारी गराउँदछौँ ।’

यसअघि बुधबार सातजना केन्द्रीय उपाध्यक्षले मातृ पार्टी माओवादी अध्यक्ष प्रचण्डसँग विशेष राष्ट्रिय सम्मेलनको माग गरिसकेका छन् ।

पवन कार्की नेतृत्वको संगठनले पनि विज्ञप्ति निकालेर पञ्चा सिंहले नेतृत्व गरेको अवैध संगठनले अखिल क्रान्तिकारीका नाममा संगठनलाई अस्तव्यस्त बनाएर शैक्षिक माफियासँग मिलेमतो गरी विश्वविद्यालयका पदाधिकारीहरुसँग नयाँ कार्यक्रमहरुको सम्बन्धन र कार्यक्रम विस्तारका नाममा आर्थिक भागबन्डा गरेको दाबी गरेको थियो ।