३५ वर्षको उमेरमा मेस्सीको उच्च लय- १८ वर्षयताकै सर्वाधिक अन्तर्राष्ट्रिय गोल

दोहा। सन् २०२२ लियोनल मेस्सीका लागि अन्तर्राष्ट्रिय गोलका हिसाबले १८ वर्षयताकै सबैभन्दा उर्वर वर्ष बनेको छ। मेस्सीले यो वर्ष १६ गोल गरिसकेका छन्।

उनले १३ खेलमा यी गोल गरेका हुन्। उनले यसमध्ये विश्वकपमा मात्र ६ खेलमा ५ गोल गरेका छन्। उनले यो वर्ष मैत्रीपूर्ण अन्तर्राष्ट्रिय खेलमा ४ खेलमा १० गोल गरेका छन्।

मेस्सीले सन् २००५ मा सिनियर अन्तर्राष्ट्रिय फुटबलमा डेब्यु गरेका हुन्। उनले पहिलो वर्ष ५ खेल खेले पनि गोल गर्न सकेका थिएनन्। सन् २००६ मा ७ खेल खेल्दै २ गोल गरेका थिए।

उनले यसबीचमा सबैभन्दा बढी गोल गरेको वर्ष सन् २०१२ रहेको थियो। त्यस वर्ष उनले ९ खेलमा १२ गोल गरेका थिए। उनले दोहोरो अंकमा गोल गरेको वर्ष त्यही एक मात्र रहेको थियो। त्यसपछि उनले सबैभन्दा बढी गोल गरेको वर्ष सन् २०२१ रहेको थियो। उनले गत वर्ष १६ खेलमा ९ गोल गरेका थिए।

मेस्सीले हालसम्म अर्जेन्टिनाको सिनियर राष्ट्रिय टोलीका लागि एक सय ७१ खेलमा ९६ गोल गरेका छन्। उनले मैत्रीपूर्ण अन्तर्राष्ट्रियमा ४४, कोपा अमेरिकामा १३, विश्वकपमा ११ र विश्वकप छनोटमा २८ गोल गरेका छन्।

जारी विश्वकपको समूहगत चरणमा दुई गोल गरेका उनले प्रिक्वाटरफाइनल, क्वाटरफाइनल र सेमिफाइनलमा एक एक गोल गरेका छन्।