कतारी राजा शेखले मेस्सीलाई किन लगाइदिए कालो पोशाक ?

काठमाडौं । आइतबार राति अघिल्लो विजेता फ्रान्सलाई हराउँदै अर्जेन्टिनाले ३६ वर्षपछि विश्वकप उपाधि उचाल्यो । लुसेल रंगशालामा अर्जेन्टिनाले उपाधि उचालेको क्षण लियोनल मेस्सीका समर्थकहरुका लागि विशेष बन्यो ।

दशकौंदेखिको विश्वकप सपना पूरा गर्दै मेस्सीले विश्वभरिका समर्थकलाई खुशी दिएको रात थियो त्यो ।

विश्वकप इतिहासमै यादगार बनेको फाइनल खेलमा ट्रफी लिन स्टेजमा पुगेका कप्तान मेस्सीलाई कतारी राजा शेख तमिम बिन हमद अल थानीले कालो र सुनौलो रंगको जालीदार पोशाक लगाइदिएका थिए ।

उक्त पोशाकलाई लिएर सामाजिक सञ्जालमा विभिन्न टीकाटिप्पणी भइरहेका छन् । सबैलाई यो पोशाकबारे जिज्ञासा रहेको छ ।

कतारका प्रतियोगिता आयोजक समितिका महासचिव हसन अल थवाडीले बीबीसीलाई उक्त पोशाकको बारेमा प्रस्ट पारेका छन् । उनले भने,‘ यो एक आधिकारिक अवसरका लागि बनाइएको पोशाक हो । र, यो विशेष समारोहमा लगाइदिइने गर्छ । यसलाई मेस्सीको जीतमा सम्मानस्वरुप लगाइदिएको हो ।’

‘विश्वकप हाम्रा लागि अरब र मुस्लिम संस्कृतिलाई दुनियासामु प्रस्तुत गर्ने अवसर रहेको थियो’, उनले थपे ।