न्यूनतम साझा कार्यक्रममा आफ्ना एजेन्डा समेटिए सरकारमा जाने राप्रपाको निर्णय

काठमाडौ । राप्रपाले प्रचण्ड नेतृत्वको सरकारमा सहभागीताका लागि शर्त अघि सारेको छ । आफ्नो पार्टीका मुख्य पाँच शीर्षकका एजेन्डा सरकारका न्यूनतम साझा कार्यक्रममा समावेश गरिए सरकारमा जाने निर्णय राप्रपाले गरेको हो ।

आज बसेको राप्रपाको कार्यसम्पादन समितिको वैठकमा सरकारमा सहभागिताबारे लामो छलफल भएको थियो । नेताहरूले पक्ष र विपक्षमा रहेर धारणा राखेका थिए । धेरै नेताहरूको जोड सरकारमा गएर आफ्ना एजेन्डा कार्यान्वयनमा लैजानुपर्ने थियो ।

बैठकमा संसदमा निर्वाचित भएका नेताहरुले सरकारमा जानुपर्ने पक्षमा वकालत गरे भने पराजित नेताहरुले प्रतिपक्षमै बस्नुपर्नेमा जोड दिएका थिए ।

अध्यक्ष राजेन्द्र लिङदेनले सबैको भावना समेटेर अनुसार आफू चल्ने बताउँदै तटस्थ बसे । दिनभरीको छलफलपछि राष्ट्रियता, स्वाधीनता, विकास, सुशासन र सेवा प्रवाहसम्बन्धी विषयहरुमा पार्टीका एजेण्डा सरकारका न्युनतम साझा कार्यक्रममा राख्न शर्त राखेको पार्टी प्रवक्ता शरदराज पाठकले नेपाल प्रेसलाई जानकारी दिए ।

यदि यी शर्तहरुमा सहमत भए राप्रपा सरकारमा सहभागी हुने निर्णय भएको छ । बैठकले यसको जिम्मेवारी अध्यक्ष लिङदेनलाई दिएको छ ।