ओली-प्रचण्ड ! भो अब माधव नेपाललाई अरु अपमान नगर

भनिन्छ, अति भयो भने क्षति हुन्छ । जुन कुरा पूर्वप्रधानमन्त्री तथा पूर्वएमाले वरिष्ठ नेता माधवकुमार नेपालको सन्दर्भमा हुबहु लागू भएको छ । एमालेमा अपमान भयो भन्दै आत्मसम्मान खोज्दै पार्टी फुटाएर नेकपा एकीकृत समाजवादी बनाएका नेपाललाई जनताले आमनिर्वाचनमा झनै अपमान गरे । जनताले मत नदिँदा उनको पार्टी राष्ट्रिय दलसम्म बन्न सकेन । माओवादीको फेरो समाउँदै कांग्रेस गठबन्धनमा लागेका नेपालले अहिले माओवादीबाट पनि अपमान सहनुपरेको छ । पाँच दलीय गठबन्धन टुटेपछि घरको न घाटको भएका छन् नेपाल । एमालेमा फर्कौं, कुन नैतिकताले फर्किउँ, नफर्काैं सांसद जोगाउनै धौ धौ पर्ने अवस्था आएको छ ।

नेकपाभित्रको शक्ति संघर्ष चुलिँदै गएपछि तत्कालीन प्रधानमन्त्री केपी शर्मा ओलीले अप्रत्याशित संसद विघटन गरे । जसले देशको राजनीतिक माहोल उथलपुथल भयो । नेकपा विभाजन भयो । एमाले पनि विघटनबाट जोगिन सकेन । माधव नेपालको नेतृत्वमा एमाले टुक्रिएर नेकपा एकीकृत समाजवादी जन्मियो । माओवादी र नेकपा एसको समर्थनमा कांग्रेस सभापति शेरबहादुर देउवाको नेतृवमा सरकार बन्यो । अध्यक्ष ओलीसँग तिक्त सम्बन्ध भएका प्रचण्ड र नेपालको यात्रा लम्बियो । तर, निर्वाचनपछि गठबन्धनको सरकार बन्ने संघारमै प्रचण्ड ओलीसँग घाँटी जोड्न पुगेका छन् । प्रचण्ड-ओली एकै ठाउँमा उभिँदा नेपाल अलपत्र परेका छन् ।

पार्टी फुटाएरै देउवालाई प्रधानमन्त्रीमा समर्थन गरेका नेपालको दाबी सत्ता गठबन्धनमा निर्वाचनपछि बन्ने पाँचवर्षे सरकारको अन्तिम एक वर्ष भए पनि आफूले नेतृत्व पाउनुपर्छ भन्ने थियो । त्यो नभए राष्ट्रपति बनेरै भए पनि राजनीतिबाट सम्मानजनक बहिर्गमन रोज्ने उनको इच्छा थियो । तर, यतिवेला उनको दुइटै इच्छा तुहिएको छ । पाँच दलीय गठबन्धन भत्किएको छ । माओवादीको साथ पनि टुटेजस्तै अवस्थामा पुगेको छ । अन्तिममा ‘हातमा लाग्यो शून्य’ भएको छ ।

पार्टी फुटाएरै देउवालाई प्रधानमन्त्रीमा समर्थन गरेका नेपालको दाबी सत्ता गठबन्धनमा निर्वाचनपछि बन्ने पाँचवर्षे सरकारको अन्तिम एक वर्ष भए पनि आफूले नेतृत्व पाउनुपर्छ भन्ने थियो । त्यो नभए राष्ट्रपति बनेरै भए पनि राजनीतिबाट सम्मानजनक बहिर्गमन रोज्ने उनको इच्छा थियो ।

एमाले छाडेपछि अध्यक्ष ओलीलाई सत्तोसराप गर्दै हिँडेका नेपाल गठबन्धन टुटेपछि कांग्रेस र माओवादीप्रति पनि आक्रोशित देखिएका छन् । छँदाखाँदाको पार्टी छोडेर नेपालले सहयोग गरेको कांग्रेस पनि आफ्नै अहमताले सर्वश्व गुमाउन बाध्य भयो । अब कांग्रेससँग मागौं के मागौं ? प्रचण्डले पनि साथ छोडेपछि उनको बार्गेनिङ पावर पनि मत्थर भएको छ । प्रचण्ड उनलाई भन्दै नभनी बालकोट पुगेकोमा नेपालको चित्त दुःखाइ छ । सर्वश्व दाउमा राखेर साथ दिएकाहरुले समेत उपेक्षा गरेपछि नेपालले अपमान नै अपमान खेप्नुपरेको छ । अब अझै अरु कति अपमान सहनुपर्ने होला नेपालले ?

त्यसैले ओली-प्रचण्ड, भो अब माधव नेपाललाई अरु धेरै अपमान नगर । सबैतिरबाट एक्लिएका विचरा भएका नेपाललाई अब साथमा लेउ र अवसर देउ । प्रचण्डलाई त नेकपाकालदेखि नै नेपालले साथ दिएका हुन्, गुण लगाएकै हुन् । अब त्यसको भए पनि ऋण तिर । नेपालले लगाएको गुणको बदला प्रधानमन्त्री प्रचण्डले नेकपा एसलाई पनि सरकारमा सहभागी गराऔं ।

एमालेमा पनि त उनले वर्षौं नेतृत्व र योगदान गरेकै हुन् । त्यसको बदलामा ओलीले पछिल्ला कदमको माफी देऊ । जे भए पनि उनी एमालेका संस्थापकमध्ये एक हुन् । एमालेलाई पनि माधव नेपालको पार्टीसँग एकता गरेर संसदको पहिलो पार्टी बन्ने मौका मिलेको छ । एमालेसँग अहिले भएको ७८ सीटमा नेकपा एसको १० सीट जोडिए स्वतन्त्र निर्वाचित सांसदद्वय किरण साह र योगी मण्डल पनि एमालेमा आउने चर्चा छ । यो अवसर एमालेले पनि आफ्नो हातबाट खेर जान दिन हुँदैन । यसपछि एमाले ९० सीटसहित संसदको ठूलो दल बन्ने निश्चित छ । हाल पहिलो दल नेपाली कांग्रेससँग ८९ सांसद छन् । त्यसैले राष्ट्रिय दल बन्न नसकेर बिलखबन्दमा परेको नेकपा एसलाई पुरानै घर फर्काएर आफ्नो राजनैतिक हैसियत पुनःस्थापना गर्ने स्वर्णिम अवसर एमालेसामु छ । यसलाई ओलीले पक्कै खेर जान दिनुहुँदैन ।

एमालेलाई पनि माधव नेपालको पार्टीसँग एकता गरेर संसदको पहिलो पार्टी बन्ने मौका मिलेको छ । एमालेसँग अहिले भएको ७८ सीटमा नेकपा एसको १० सीट जोडिए स्वतन्त्र निर्वाचित सांसदद्वय किरण साह र योगी मण्डल पनि एमालेमा आउने चर्चा छ । यो अवसर एमालेले पनि आफ्नो हातबाट खेर जान दिन हुँदैन ।

कुरा रह्यो नेता नेपालको मानसम्मानको । लिखित रुपमै आरोप-प्रत्यारोपमा उत्रेका एक-अर्काका कटु आलोचक ओली-प्रचण्डसमेत मिल्न सक्छन्, एकै ठाउँमा उभिनसक्छन् भने वर्षौं योगदान गरेको पार्टीमा फर्किन नेपाललाई केको आइतबार ? एमालेका दोस्रो तहका नेताहरुले सम्मानपूर्वक नै नेपाललाई एमालेमै फर्कन अनुनयविनय गरिरहेकै छन् । नेपाललाई सम्मानपूर्वक घरफिर्ती गराउन एमाले नेताहरुले अध्यक्ष ओलीलाई दबाब दिइरहेका छन् । एमाले उपाध्यक्ष विष्णु पौडेल, सुवास नेम्वाङदेखि उपमहासचिव पृथ्वी सुब्बा गुरुङ, नेता महेश बस्नेतसम्मले पार्टी एकीकरण गरेर सम्मान र गौरव आर्जन गर्न सुझाइरहेका छन् ।

यसै पनि पार्टी विधानमा उल्लेखित ७० वर्षे उमेर हदका कारण ओलीको यो नै अन्तिम कार्यकाल हुनेछ । उनले पार्टी अध्यक्षमा यो नै आफ्नो अन्तिम कार्यकाल रहेको भनिसकेका छन् । नेकपा एमाले र एसको एकता हुँदा नेपालले पुनः नेतृत्व गर्न पाउने अवस्था छ । दुई पार्टीको एकताको लागि ओली-नेपालले गर्ने हिम्मत र आँटले दुबै पार्टीका नेता-कार्यकर्ताको भविष्य उज्ज्वल बन्ने निश्चित छ । आम नेता-कार्यकर्ताको भावनाअनुरुप उचित निर्णय गर्नु दुबै अध्यक्षको दायित्व हो र जिम्मेवारी पनि ।

अब ओली र प्रचण्डले नेपालसँग कुराकानी र छलफलमात्रै होइन, छिनोफानो नै गरौं । नेपाललाई आफूहरुको गठबन्धनमा सहभागी बनाऔं । र, यो अवसरलाई नेपालले पनि विनासर्त, विनाहिचकिचाहट सम्मानपूवर्क सदुपयोग गरौं । जसले आफ्नोमात्रै होइन सिंगो नेकपा एस र यसका नेता तथा कार्यकर्ताहरुको भविष्य सुनिश्चित गरोस् । आगे हजुरको मर्जी !