राजकुमार शर्मा कर्णालीको मुख्यमन्त्री बन्ने निश्चित, यामलालको सपनामा ब्रेक

सुर्खेत । आइतबार साँझ बालुवाटारमा बसेको सत्ता साझेदार दलका शीर्ष नेताहरूको बैठकको सहमतिपछि यामलाल कँडेललेको मुख्यमन्त्री बन्ने सपनामा ब्रेक लागेको छ ।

शीर्ष नेताहरूको बैठकले सातै प्रदेशमा गरेको भागबन्डाअनुसार कर्णालीमा माओवादीले बाजी मार्‍यो । उक्त निर्णयले कर्णालीमा मुख्यमन्त्रीका लागि चर्चा बटुलेका कँडेल यसपटक पनि मुख्यमन्त्री बन्ने बाटोबाट किनारा लागेका हुन् ।

२०७४ सालको निर्वाचनबाटै मुख्यमन्त्रीको लाइनमा बसेका कँडेल त्यति बेला केन्द्रमा एमालेको सरकार बनेसँगै मुख्यमन्त्रीको लागि वञ्चित भएका थिए ।

कँडेल दोस्रो कार्यकालको लागि सुर्खेत निर्वाचन क्षेत्र नम्बर–२ प्रदेश सभा (२) बाट निर्वाचित भएका थिए । उनी मुख्यमन्त्री बन्ने मौकामा यस पटक पनि प्रदेश सभामा चुनाव लडेका हुन् । तर कँडेलले सोचेको भन्दा फरक परिणाम आएको छ ।

सात दलीय सत्ता गठबन्धनको बैठकले सात वटै प्रदेशमा मुख्यमन्त्री र सभामुखबारे भागबन्डा मिलाएको छ ।

सहमति अनुसार कर्णाली प्रदेशको मुख्यमन्त्री पद नेकपा माओवादी केन्द्रको भागमा परेको छ । अन्य प्रदेशमा दलहरुबीच आलोपालो सरकार चलाउने सहमति भए पनि कर्णालीमा ५ वर्ष माओवादीले सरकार चलाउने भएको छ ।

सभामुख भने एमालेको पोल्टामा परेको छ । तर भागबन्डामा कर्णाली एमालेको भागमा मुख्यमन्त्री पद नपर्दा कँडेलको अब पाँच वर्षसम्म मुख्यमन्त्री बन्ने सपना ब्रेक लागेको हो ।

माओवादीका शर्मा बन्दै मुख्यमन्त्री

अब कर्णाली प्रदेशको मुख्यमन्त्रीमा नेकपा (माओवादी केन्द्र) का राजकुमार शर्मा (आर्ट) मुख्यमन्त्री बन्ने भएका छन् ।

सत्ता साझेदार दलका शीर्ष नेताहरूको बैठकले कर्णालीमा माओवादीको नेतृत्वमा सरकार गठन गर्ने निर्णय गरेसँगै शर्मा मुख्यमन्त्री बन्ने भएका हुन् ।

१३ सिटसहित दोस्रो स्थानमा रहेको माओवादीले दोस्रो पटक पनि सरकारको नेतृत्व गर्ने अवसर प्राप्त गरेको छ ।

शर्मालाई पुस १३ गते बसेको माओवादीको प्रदेश कमिटीको बैठकले शर्मालाई संसदीय दलको नेतामा सर्वसम्मत चयन गरेको थियो । रुकुम पश्चिम (२) बाट निर्वाचित शर्मा अब कर्णालीको तेस्रो मुख्यमन्त्री बन्ने छन् ।