आफ्नो पारिश्रमिकको १० प्रतिशत चलचित्र कलाकार संघलाई दिने सविन श्रेष्ठको घोषणा

काठमाडौं । आसन्न चलचित्र कलाकार संघको चुनावमा अध्यक्ष पदमा उम्मेदवारी घोषणा गरेका अभिनेता सविन श्रेष्ठले आफूलाई अभिनयबाट प्राप्त हुने पारिश्रमिकको १० प्रतिशत कलाकार संघलाई दिने घोषणा गरेका छन् । आफ्नो सामाजिक सञ्जालमार्फत स्टाट्स लेख्दै उनले सो घोषणा गरेको बताएका हुन्।

‘आजका दिनसम्ममा आफूले पाएको माया, सम्मान र इज्जतको श्रेय नेपाली चलचित्र क्षेत्र भएको बताउँदै उनले फेसबुकमा लेखेका छन्, ‘ माघ १ गतेबाट मैले कुनै पनि चलचित्र, ,म्युजिक भिडियो ,बिज्ञापन तथा यसै क्षेत्रमा सम्बन्धित रहेर गरेको काममार्फत पाएको पारिश्रमिकबाट १० प्रतिशत म नेपाल चलचित्र कलाकार संघमा दिन चाहन्छु । यसबाट नेपाल कलाकार संघ मार्फत कसैलाई सानो भन्दा सानो सहयोग भयो भने मलाई खुशी लाग्नेछ।’

आफूले पाउने पारिश्रमिकबाट कर कटाएर मात्र आफूलाई दिन समेत उनले आग्रह गरेका छन् ।

सोमबारमात्र सविन प्रमुख भूमिकामा रहने चलचित्र ‘सिड्नी’को निर्माण घोषणा भएको थियो भने अहिले उनैले निर्माण गरेको चलचित्र ‘हिरो रिटन्र्स’ प्रदर्शनीको तयारीमा छ ।