प्रचण्ड र ओलीलाई भेटेपछि रेशम चाँडै छुट्ने नागरिक उन्मुक्तिकाे आशा, ३ महिनाको ‘डेट लाइन’मा विश्वासको मत दिने सम्भावना

कैलाली । सुदूरपश्चिम प्रदेशका नागरिक उन्मुक्ति पार्टीका सांसद तथा नेताहरूले प्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल प्रचण्ड र एमाले अध्यक्ष केपी शर्मा ओलीलाई भेटेपछि रेशम चौधरी रिहा हुनेमा केही आशा पलाएको बताएका छन् ।

सुदूरपश्चिम प्रदेशमा निर्णायक शक्तिका रुपमा रहेको नागरिक उन्मुक्तिले आफ्नो पार्टीका संरक्षक रेशम चौधरी रिहा नहुँदासम्म विश्वासको मत नदिने अडान लिएको थियो ।

यसैबीच एमाले-माओवादीसहितका सांसद र नेताहरूसँग बालकोट हुँदै बालुवाटार पुगेका नागरिक उन्मुक्तिका नेताहरूले सरकार आफ्ना मुद्दामा गम्भीर रहेकाले सरकारप्रति विश्वास बढेको बताएका छन् ।

‘हामी एमाले अध्यक्ष र प्रधानमन्त्रीलाई भेटेपछि केही उत्साहित छौं’, नागरिक उन्मुक्तिका एक नेताले भने, ‘उहाँ (रेशम) रिहा हुनुहुन्छ भन्नेमा हामीलाई विश्वास बढेको छ ।’

टोलीले शनिबार साँझ बालकोट पुगेर एमाले अध्यक्ष ओलीलाई र सोमबार बिहान बालुवाटार पुगेर प्रधानमन्त्री प्रचण्डलाई भेटेको थियो । एमाले अध्यक्ष ओलीले नागरिक उन्मुक्तिका सांसद तथा नेताहरूलाई १५ दिनदेखि ३ महिनासम्ममा रेशम रिहा हुनेमा आश्वस्त रहन आग्रह गरेका थिए ।

‘उहाँ (ओली)ले तपाईंहरू ढुक्क भएर जानुहोस् । रेशम १५ दिनदेखि ३ महिनासम्ममा रिहा हुनुहुन्छ भन्नुभएको छ’, ती नेताले भने, ‘एमाले अध्यक्ष तथा पूर्वप्रधानमन्त्रीबाट यस्ता कुरा सुन्दा हामी निकै खुशी छौं ।’

सोमबारको भेटमा पनि प्रचण्डले उनीहरूलाई सरकार रेशम रिहा गराउने विषयमा प्रतिबद्ध रहेको बताएका थिए । सर्वोच्च अदालतलाई सरकारले हस्तक्षेप गर्न नमिल्ने हुँदा केही समय लाग्न सक्ने प्रचण्डको आशय थियो ।

‘रेसमलाई रिहा गर्ने विषयमा सबै दलहरू एक ठाउँमा छौं’, प्रचण्डको भनाइ उद्धृत गर्दै उन्मुक्तिका एक नेताले भने, ‘मैले पनि कारागारमा उहाँसँग धेरै कुरा गरेको छु । उहाँ चाँडै रिहा हुनुहुन्छ ।’

नागरिक उन्मुक्तिका नेताहरूले रेशमका विषयमा एमाले अध्यक्ष ओली र प्रधानमन्त्री प्रचण्डको धारणा एउटै भएको बताए । सरकारको आधिकारिक धारणापछि रेशम चाँडै रिहा हुनेमा आफूहरु विश्वस्त रहेको उनीहरु बताउँछन् ।

सरकार रेशम रिहा गर्न गम्भीर भएको सन्देश नागरिक उन्मुक्तिका नेताहरूले डिल्लीबजारस्थित कारागारमा रहेका रेशम चौधरीलाई पनि सुनाइसकेका छन् । तर, सुदूरपश्चिममा विश्वासको मत दिने विषयमा भने अझै रेशमले आफ्ना सांसदहरूलाई निर्देशन दिएका छैनन् ।

सरकारको तर्फबाट रेशम चौधरीसँग आधिकारिक धारणा राखेपछि मात्रै सुदूरपश्चिम प्रदेशमा गठबन्धनलाई विश्वासको मत दिने रेशमको योजना रहेको छ ।

सुदूरपश्चिममा पुस २७ गते एमाले संसदीय दलका नेता राजेन्द्र रावल मुख्यमन्त्री नियुक्त भएका थिए । माघ २७ भित्र विश्वासको मत लिनुपर्ने संवैधानिक बाध्यता छ । यहाँका मुख्यमन्त्री रावललगायत मन्त्री खगराज भट्ट र एमाले अछामका इन्चार्ज तथा पूर्वप्रदेशमन्त्री झपट बोहरा पनि बालकोट र बालुवाटार बैठकमा सहभागी भएका थिए ।

नागरिक उन्मुक्ति पार्टीका मागमा विषयमा सरकार गम्भीर रहेको भन्दै केही समयभित्रै सरकारले पूर्णता पाउने अछाम इन्चार्ज बोहराले बताए ।

‘सम्माननीय प्रधानमन्त्रीज्यूले नागरिक उन्मुक्तिको माग सम्बोधन गर्ने आधार दिइसक्नुभएको छ । एमालेका श्रदेय अध्यक्षज्यूले पनि त्यही बोल्नुभएको छ । उहाँहरू (नागरिक उन्मुक्ति) पनि यस विषयमा विश्वस्त हुनुहुन्छ’, बोहराले भने, ‘अब चाँडै मुख्यमन्त्रीले विश्वासको मत पाउनुहुन्छ र सरकार अघि बढ्छ ।’

५३ जना सदस्य रहेको सुदूरपश्चिम प्रदेशमा एमालेका रावलले एमालेसहित माओवादी, नागरिक उन्मुक्ति र राप्रपाको समर्थनमा मुख्यमन्त्रीमा दाबी गरेका थिए । यहाँ माओवादीका ११ (सभामुख सहित), एमालेका १०, नागरिक उन्मुक्तिका ७ र राप्रपाका १ सांसद छन् । बहुमतका लागि २७ सांसद आवश्यक पर्नेमा २९ सांसदको समर्थनमा रावल मुख्यमन्त्री भएका हुन् ।

नागरिक उन्मुक्तिले विश्वासको मत नदिए सरकार अल्पमतमा पर्ने हुँदा अहिले एमाले र माओवादीका सांसद तथा नेताहरू नागरिक उन्मुक्तिको माग सम्बोधन गरेर उनीहरूलाई सँगै हिँडाउन प्रयासरत छन् ।