नेपालको आर्थिक वृद्धिदर ऋणात्मक

काठमाडौं । गत वर्ष नेपालको आर्थिक वृद्धिदर ऋणात्मक देखिएको छ ।

आधार वर्ष परिवर्तन गर्दै केन्द्रीय तथ्यांक विभागले सार्वजनिक गरेको तथ्यांकअनुसार आर्थिक वृद्धिदर ऋणात्मक देखिएको हो । गत वर्ष आर्थिक वृद्धिदर २.२७ प्रतिशत हुने अनुमान रहेकोमा आधार वर्ष परिवर्तन गर्दा १.९९ प्रतिशतले आर्थिक वृद्धिदर ऋणात्मक देखिएको हो ।

त्यस्तै चालू आर्थिक बर्षको पहिलो त्रेमासिकमा ४.६ प्रतिशतले ऋणात्मक हुने अनुमान रहेको कार्यक्रममा बताइएको छ ।

कोरोना महामारीका कारण नकारात्मक भएपनि अर्थतन्त्रमा ‘V’ सेपमा सुधार भएको  केन्द्रिय तथ्याङ्क विभागले बताएको छ । यसले गर्दा आगामी आर्थिक वर्षमा आर्थिक वृद्धिदर सकारात्मक बन्नेमा आशावादी हुन सकिने विभागको दाबी छ । यसअघि सन् २०००/२००१ लाई आधार वर्ष मानिएकोमा अहिले २०१०/२०११ लाई आधार वर्ष मानेर आर्थिक वृद्धिदर सार्वजनिक गरिएको हो ।

राष्ट्रिय लेखा प्रतिबेदन तयार पार्न बिभागले यो सहित पाँच पटक आधार वर्ष परिवर्तन गरेको हो । अर्थतन्त्रमा भएका परिवर्तनलाई बढी यथार्थपरक बनाउन केन्द्रीय तथ्यांक विभागले आधार बर्ष परिवर्तन गर्ने गर्छ ।

नेपालमा १० बर्षमा १४ प्रतिशतले कुल गार्हस्थ्य उत्पादन १४ प्रतिशतले बढेको छ। हाल नेपालको कुल गार्हस्थ उत्पादन ३९ खर्ब ४३ अर्ब पुगेको छ । गत वर्षको तुलनामा ५ प्रतिशतले बढेको छ ।