चलचित्र ‘प्रेमा’को ‘मन मनमा’ बोलको गीत सार्वजनिक

काठमाडौं । आगामी चैत १७ गतेबाट रिलिजको तयारीमा रहेको चलचित्र ‘प्रेमा’को ‘मन मनमा’ बोलको गीत सार्वजनिक भएको छ । रिकेश गुरुङ र सुबानी मोक्तानको स्वर रहेको गीतमा चलचित्रका प्रमुख दुई पात्र शुभेक्षा खड्का र अरुण क्षेत्री फिचर्ड छन् । गीतमा अर्की अभिनेत्री सृष्टि श्रेष्ठको पनि ‘सरप्राइज’ प्रवेश देखाइएको छ ।

अनिल शर्मा र सुशान्त गौतमको शब्द रहेको गीतमा सुशान्तकै सङ्गीत रहेको छ । विशेषत पर्यटकीय क्षेत्रहरुमा छायाङ्कन गरिएको गीतका अधिकांश दृश्यमा मठमन्दिरसँगै काठमाडौं उपत्यका समेटिएको छ । गीत बाघठाटा फिल्म फ्याक्ट्रीको युट्युब च्यानलबाट सार्वजनिक गरिएको छ ।

चलचित्रमा शुभेक्षाले शीर्ष चरित्र ‘प्रेमा’को भूमिका निर्वाह गरेकी छन् । निर्देशक गोविन्द सिंह भण्डारीको लेखन तथा निर्देशन रहेको फिल्म बाघठाटा फिल्म फ्याक्ट्रीको ब्यानरमा निर्माण गरिएको हो ।

काठमाडौं, धनगढी र कर्णालीमा सुटिङ गरिएको चलचित्रमा अरुण, शुभेक्क्षा र सृष्टिका अलावा विमला केसी, हिउँवाला गौतम, पुरण जोशी, सबिन बास्तोला, रोशनी स्याङबो, प्रकाश बस्नेत, महान थापा, सुरेन्द्र बसेल, भिभियाना थपलिया(काजु) लगायतका कलाकारहरुको समेत अभिनय रहेको छ ।

त्रिकोणात्मक प्रेमकथा बोल्ने उक्त चलचित्रलाई गोविन्द सिंह भण्डारी र विवेक घिमिरेले निर्माण गरेका हुन् ।

सामर्थविक्रम थापाको कार्यकारी निर्माण रहेको चलचित्रमा सुशान्त गौतमको संगीत, सबिन एकतारे र अनिल शर्माको गीत, चन्द्र भट्टराईको प्रमुख सहायक निर्देशन, अमित श्रेष्ठको व्याकग्राउण्ड स्कोर, कृष्ण भण्डारीको सम्पादन र महेश पौडेलको डीओपी रहेको छ ।

चलचित्रलाई उपत्यकामा जीजीए ग्रुप र उपत्यका बाहिर एफडी कम्पनीले वितरण गर्ने भएको छ ।