रास्वपा प्रमुख सचेतकलाई प्रश्न- रामचन्द्रलाई सघाउँदा एमालेलाई धोका भएन ?

काठमाडौं । राष्ट्रिय स्वतन्त्र पार्टीका प्रमुख सचेतक सन्तोष परियारले लोकतन्त्रलाई बलियो बनाउन मतदानमा भाग लिने निर्णय गरेको बताएका छन् । संसदीय दल र पार्टी पदाधिकारीको संयुक्त बैठकपछि उनले यस्तो बताएका हुन् ।

उनले भने, ‘लोकतन्त्रलाई बलियो बनाउन मतदानमा भाग नलिने भन्ने हुँदैन । त्यसमा सबै सांसदहरुको एकमत छ । निर्वाचन आचारसंहितको कारणले यो गर्ने वा त्यो गर्ने भन्न पाउँदैनौं । हामी लोकतन्त्रलाई बलियो बनाउने र व्यवस्थालाई रक्षा गर्नेको पक्षमा उभिएका छौं ।’

रास्वपाले राष्ट्रपतिमा सत्ता गठबन्धनको उम्मेदवार रामचन्द्र पौडेललाई उम्मेदवार बनाउने निर्णय गरेको छ । निर्णयपछि राष्ट्रपतिमा सहयोग गरेर उपचुनावमा सहयोग पाउने अपेक्षा राखेको हो ? भन्ने प्रश्नमा उनले भने, ‘हामीले आजको बैठकमा राष्ट्रपतिको निर्वाचनबाहेक छलफल गरेका छैनौं । हामी त्यो उपयुक्त समयमा गर्नेछौं ।’

हिजो रवि लामिछानेलाई गृहमन्त्री बनाउने विषयमा प्रचण्ड र ओलीबीचको सम्बन्धन बिग्रियो । अहिले गठबन्धन रोज्दा एमालेलाई धोका भएन र ? भन्ने प्रश्नमा उनले भने, ‘राजनीतिमा धोका हुँदैन । तथ्यमा हुन्छ । राजनीतिमा एकखालको कारण हुन्छ । त्यो कारण केलाउदै जाँदा पछि फरक भाष्यहरू निर्माण होलान् । तर, अहिले हामीले राष्ट्रपतिको विषयमा कुरा गरेका हौं ।’