समीक्षा र कमला देखिए एउटै गीतमा, ‘धनगढीको बसमा ३’ युट्युबमा रिलिज

काठमाडौं । ‘विशाल इन्टरटेनमेन्ट’ युट्युब च्यानलमार्फत आज एउटा गीत रिलिज भएको छ, जसको बोल छ, ‘रेलैमा रेलैमा, मुसुक्क हासिँदेउ जाने बेलैमा ।’

यो गीत एक वर्षअघि सार्वजनिक भएको ‘धनगढीको बसमा’ बोलको गीतको तेस्रो संस्करण हो । गीतमा समीक्षा अधिकारी, अमृत सापकोटा र पूजा देवकोटाले स्वर दिएका छन् । गीतको भिडियोमा दुई नवोदित गायिकाहरु समीक्षा अधिकारी र कमला घिमिरेलाई देख्न सकिन्छ ।

सानै उमेरमा नाम कमाएका दुई प्रतिभाशाली गायिकाहरु एउटै म्युजिक भिडियोमा फिचर्ड हुनु कुनै अनौठो कुरा होइन । यद्यपि, केही महिनाअघि कमलाले एउटा लाइभ दोहोरीमा समीक्षालाई लक्षित गर्दै नमीठो कटाक्ष गरेकी थिइन् । सुमन परियारसँग उनले गाएको लाइभ दोहोरीको विषयवस्तु नै विवादास्पद बनेको थियो ।

उक्त दोहोरीको एउटा टुक्का यस्तो थियो
‘जानु है बेलुका पानी पिएर
घुम्न जाउँ तल्तिर १० लाख लिएर’

उक्त दोहोरी भाइरल भएपछि कतिले वास्तविकता ओकलेको भन्दै कमलाको प्रशंसा गरे भने कतिले उनको आलोचना पनि गरे । तर, समीक्षालाई भने यसले चोट परेको थियो । सो दोहारीपश्चात समीक्षा र कमलामा खटपट परेको हुनसक्ने धेरैको अनुमान थियो । तर, पुराना कुराहरुलाई बिर्सेर कमला र समीक्षाले एउटै म्युजिक भिडियोमा सहकार्य गरेका छन् ।

सार्वजनिक ‘धनगढीको बसमा ३’ मा समीक्षा र कमलाले दिदीबहिनीको भूमिका निर्वाह गरेका छन् । गीतमा समीक्षा र कमलाबाहेक टिकटकर मिस पबी, बसन्त न्यैपाने र गोविन्द भट्टराई पनि फिचर्ड छन् । नेत्र अर्यालको शब्द रहेको गीतलाई कजिस श्रेष्ठले कोरियोग्राफी गरेका छन् ।

‘धनगढीको बसमा’ को चौथो भाग आउँदो दशैंमा आउने जानकारी दिइएको छ । ‘धनगढीको बसमा ३’ आज रिलिज भए पनि समीक्षा भने नेपालमा छैनन् । कार्यक्रमको लागि उनी अहिले अष्ट्रेलिया पुगेकी छन् ।