मन्त्रीले लगाएको कोट फेर्न नपाउँदै सरकार परिवर्तन हुन थाल्यो: शाही

गुल्मी । राष्ट्रिय प्रजातन्त्र पार्टीका प्रवक्ता तथा सङ्घीय सांसद ज्ञानेन्द्र शाहीले संसद भवन झगडा गर्ने थलो बनेको टिप्पणी गरेका छ्न् ।

शुक्रबार सदरमुकाम तम्घासमा जिल्ला पार्टी राप्रपाले आयोजना गरेको पत्रकार सम्मेलनमा शाहीले संसद भवनमा जनताको समस्या समाधान गर्ने विषयमा छलफल नभई झगडा गर्ने थलो बनेको बताएका हुन् ।

देशमा पछिल्लो अवस्था राजनीति अवसरवादी भएको उनले बताए । मन्त्रीहरूले लगाएको कोट परिवर्तन गर्न नपाउँदै सरकार परिवर्तन हुने गरेको बताउँदै शाहीले राजनीति राज्यको निम्ति नभई अवसरका निम्ति भएको र राजनीति घीनलाग्ने खालको भएको टिप्पणी गरे ।

देशमा राजनीतिक अस्थिरताका कारण आर्थिक अवस्था संकटमा रहेको उनको भनाइ छ । प्रवक्ता शाहीले राज्यको करले कर्मचारीलाई तलब पनि खुवाउन नसक्ने भन्दै राज्यको नाममा २० खर्बभन्दा बढी आर्थिक भार रहेको बताए ।