डलर भएकाे पार्सल पाउन एक महिलाले अपरिचितलाई पठाइन् एक करोड २८ लाख, बैंक खाता प्रयोग भएका ३९ जना नेपालीविरुद्ध ठगी मुद्दा

काठमाडौं । एक महिलामाथि भएको एक करोड २८ लाख नेपाली रुपैयाँको अनलाइन ठगीमा काठमाडौं जिल्ला सरकारी वकिल कार्यालयले ३९ जनालाई प्रतिवादी बनाएर मुद्दा दर्ता गरेको छ । यसमा ३७ जना फरार छन् । अनुसन्धानका क्रममा ठगी गिरोहले प्रतिवादी बनाइएका अधिकांशको बैंक खाता प्रयोग गरेर पैसा लिएको पाइएको छ।

पक्राउ परेकी गोरखाको आरुघाटकी २२ वर्षीया नइया गुरुङले सामाजिक सञ्जालमार्फत चिनजान भएका एक चिनियाँ नागरिकले आफूलाई विवाह गर्नेसमेत प्रलोभन देखाएर इक्सपोर्ट इम्पोर्टको व्यापारका लागि नेपाली बैंक खाता चाहिएको भन्दै खाता खोल्न लगाएको बताएकी छन् ।

उनका अनुसार बैंकको सम्पूर्ण अनलाइन युजरनेम र पासवर्डसमेत ती व्यक्तिलाई दिएकी थिइन् । अनुसन्धानका क्रममा ती युवतीले बैंकमा पैसा जम्मा भएको जानकारी पाएर सोध्दा ती चिनियाँ नागरिकले इक्सपोर्ट इम्पोर्टका लागि पैसा जम्मा भएको बताउने गरेको उल्लेख गरेकी छन् ।

प्रहरीका अनुसार जाहेरवाला महिलालाई गत बैशाख १६ गते एक व्यक्तिले ह्वाट्सएपमार्फत सम्पर्क गरी साथी बनेका थिए । जाहेरीअनुसार एक दिन भारतबाट ती महिलालाई तपाईंलाई ५० हजार अमेरिकी डलर भएको पार्सल आएको भन्दै भन्सार कर तिर्न खबर आएको थियो । उनले जेठ २ गते पहिलोपटक ३५ हजार रुपैयाँ जम्मा गरेकी थिइन् ।

यही सिलसिलामा उनले ८ जनाको नाममा एक करोड १५ लाखभन्दा बढी जम्मा गरेकी थिइन् । त्यसमध्ये यादवसिंह गुरुङ भन्ने व्यक्तिको नाममा रहेका तीनवटा बैंक खातामा मात्र ६९ लाख रुपैयाँभन्दा बढी जम्मा भएको पाइएको छ ।

पक्राउ परेका अर्का व्यक्ति सुकेश्वर यादवले बैंक खातामा जम्मा भएको एक लाखवापत २०० रुपैयाँ पाउने आशामा गिरोहले जालोमा पारेको बताएका छन् । सप्तरीको सम्सी गाउँपालिकामा ओम मनी ट्रान्सफर सञ्चालन गर्दै आएका उनले एक अपरिचित व्यक्ति आएर आफ्नो खाता नम्बर माग्दै त्यसमा एक लाख रुपैयाँ जम्मा भएवापत २०० रुपैयाँ दिने बताएपछि त्यही लोभमा आफूले बैंक खाता दिएको सरकारी वकिलसँग बयान दिएका छन् ।