उद्योग वाणिज्य महासंघको निर्वाचन : मतदान जारी, को को छन् मैदानमा ? (भिडिओ)

काठमाडौं । नेपाल उद्योग वाणिज्य महासंघको ५७औं साधारणसभाको दोस्रो दिन बुधबार नयाँ कार्यसमिति चयनका लागि निर्वाचन भएको छ । महासंघका प्रतिनिधिले वरिष्ठ उपाध्यक्षसहित कार्यसमितिका सदस्य चयन गर्न मतदानमा भाग लिएका हुन् ।

निर्वाचनमार्फत आगामी तीन वर्षका लागि वरिष्ठ उपाध्यक्षसहित कार्यसमिति सदस्यहरु चुँनिदैछ । वरिष्ठ उपाध्यक्ष स्वतः अध्यक्ष हुने महासंघको विधानअनुसार वर्तमान वरिष्ठ उपाध्यक्ष चन्द्रप्रसाद ढकालले नेतृत्व सम्हाल्दैछन् ।

वरिष्ठ उपाध्यक्षका लागि रामचन्द्र संघई, अञ्जन श्रेष्ठ र उमेशलाल श्रेष्ठबीच त्रिपक्षीय प्रतिस्पर्धा छ । संघई प्यानलबाट जिल्ला नगर उपाध्यक्षमा सुरकृष्ण वैद्य, वस्तुगत उपाध्यक्षमा सुकुन्तलाल हिराचन र एसोसिएट उपाध्यक्षमा ज्योत्सना श्रेष्ठ रहेका छन् ।

अञ्जन श्रेष्ठ प्यानलमा वस्तुगत उपाध्यक्षमा मनिषलाल प्रधान र जिल्ला नगर उपाध्यक्षमा अरुणराज सुमार्गी उम्मेदवार छन् । उमेशलाल श्रेष्ठको प्यानलमा जिल्ला नगर उपाध्यक्षमा दिनेश श्रेष्ठ र वस्तुगत उपाध्यक्षमा हेमराज ढकाल उम्मेदवार छन् ।

महासंघको विधानअनुसार वरिष्ठ उपाध्यक्षको उम्मेदवार निर्वाचित हुने ५० प्रतिशतभन्दा बढी मत प्राप्त गर्नुपर्ने भएकाले कुनै उम्मेदवार पहिलो चरणमा निर्वाचित हुन नसकेका दोस्रो चरणअन्तर्गत बिहाबार फेरि मतदान हुने महासंघले जनाएको छ ।