ओलीविरुद्धका गतिविधि बहिष्कार गरौं : ऐन महर

प्रधानमन्त्री केपी शर्मा ओलीले संसद विघटनको निर्णय गरी चालेको कदममाथि नेकपा निकट अखिल अनेरास्ववियुका संयोजक ऐन महरले समर्थन जनाएका छन् ।

उनले सामाजिक सञ्जालमार्फत् नयाँ जनादेशका लागि प्रधानमन्त्रीले चालेको कदम बाध्यात्मक भएको भन्दै यसलाई समर्थन गरी ताजा जनादेशका दागि तयार रहन आग्रह गरेका छन् ।

राष्ट्रपतिविरुद्ध महाअभियोग र प्रधानमन्त्री विरुद्ध अविश्वासको प्रस्तावव दर्ता गर्ने निर्णय अघि सारेपछि प्रम ओलीले उक्त कदम चालेको महरले दाबी गरेका छन् ।

‘२०७४ सालमा प्राप्त जनमतको सम्मान नगरी राजनीतिक अस्थिरताका पुजारीहरू मार्चण्ड गुटले राष्ट्रपतिका विरुद्ध महाभियोग र प्रधानमन्त्रीका विरुद्ध अविश्वासको प्रस्ताव दर्ता गर्ने निर्णय गरेर अगाडि बढेपछि नयाँ जनादेशका लागि प्रधानमन्त्रीले चाल्नुभएको बाध्यात्मक कदम हो संसद बिघटन। सबैले समर्थन गरौं र हिम्मत हुनेहरूले ताजा जनादेशका लागि तयार बनौं,’ संयोजक महरले लेखेका छन् ।

उनले ओलीवविरुद्ध गरिएका मार्चण्ड गुटका गतिविधि र कदमहरूलाई जनमत, संविधान र राष्ट्रविरोधी संज्ञा दिँदै त्यसलाई खबरदारी गर्न आग्रह गरेका छन् ।

संयोजक महरले नेकपाको कुनै पनि जनवर्गीय संगठनको प्रदर्शन नभएको जानकारी गराउँदै हुल्लडवाजको हुलमा सहभागी नहुन समेत आग्रह गरेका छन् ।

उनले लेखेका छन्, ‘आज पुस ५ गते नेकपा को कुनै पनि जनवर्गीय संगठनको प्रदर्शन नभएको जानकारी गराउँदै हुल्लडवाजहरुको हुल्लोमा सहभागी नहुन सम्पुर्णमा हार्दिक अनुरोध छ ।’