जतिन्दरको शतकमा मलेसियालाई हराउँदै सेमिफाइनलनजिक ओमान

काठमाडौं । जतिन्दर सिंहको शतकप्रेरित मलेसियालाई ८ विकेटले पराजित गर्दै ओमान जारी एसीसी प्रिमियर कपको सेमिफाइनलनजिक पुगेको छ ।

मुलपानी मैदानमा सम्पन्न खेलमा मलेसियाले दिएको २२८ रनको लक्ष्य ओमानले ५० बल बाँकी रहँदा दुई विकेट पूरा गर्‍यो । ओमानको जितमा ओपनर जतिन्दर सिंहले अविजित शतकीय इनिङ खेले । उनले १ सय ११ बल खेल्दै १२ चौका र एक छक्का प्रहार गरे ।

ओपनर कास्यप प्रजापति ६९ बलमा ९ चौका र १ छक्काको मद्दतमा ६६ रन बनाएर आउट हुँदा कप्तान जिसन मक्सुद ५८ बलमा ५२ रन बनाएर अविजित रहे । मलेसियाका मोहमद अमिरले दुई विकेट लिए ।

पहिला ब्याटिङ गरेको मलेसियाका ओपनर विरन्दीप सिंहले सर्वाधिक ९४ रनको इनिङ खेले । मक्सुदको बलमा बोल्ड हुनुअघि उनले १ सय ४४ बल खेल्दै १३ चौका प्रहार गरे ।

मोहमल अमिर २० रनमा आउट हुँदा सयद अजिजले १८ रन जोडे । मोहमद स्यादत्त ६० बलमा ६ चौका र एक छक्कासहित ५५ रनमा आउट भए ।

मोहमद वाकिफ १९ रनमा अविजित रहँदा अन्य ब्याटर दोहोरो अंकमा रन बनाउन सकेनन् ।

ओमानको बलिङमा कप्तान मक्सुदले १० ओभरमा ३५ रन खर्चिएर सर्वाधिक ४ विकेट लिए । आयान खान र बिलाल खानले दुई-दुई विकेट लिँदा करिमउल्लाहले एक विकेट लिए ।

जितसँगै समूह ए मा रहेको ओमानले तीन खेलमा ४ अंक जोडेर दोस्रो स्थानमा रहेको छ । समूह चरणको अन्तिम खेलमा अब ओमानले साउदी अरबियासँग खेल्नेछ । यो जितसँगै ओमानले सेमिफाइनल सम्भावना बलियो बनाएको छ ।