राप्रपा प्रवक्ताको असन्तुष्टी– पार्टीका साथीहरु भष्मासुर भए

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले आफ्नै पार्टीका केही नेताहरुलाई ‘भष्मासुर’ संज्ञा दिएका छन् । राप्रपाले चुनावमा पराजय भोगिरहँदा ती नेताहरुले जित्नेलाई उत्साहित हुँदै बधाई दिएको उनको आरोप छ ।

राप्रपाले उपचुनावमा उल्लेख्य मत प्राप्त गर्न सकेको छैन । तर, केही नेताहरुले राष्ट्रिय स्वतन्त्र पार्टीका रवि लामिछाने र स्वर्णिम वाग्लेलाई सामाजिक सञ्जालबाट बधाई दिएका छन् ।

पार्टी महामन्त्री शरदराज पाठक, नेता प्रेमकुमार श्रेष्ठलगायतले सामाजिक सञ्जालमा लामिछाने र वाग्लेलाई बधाई दिएका थिए । श्रेष्ठले लामिछानेसँगको फोटोसमेत राखेर उनलाई ट्याग गरेका थिए ।यसै विषयमा श्रेष्ठले असन्तुष्टि व्यक्त गरेका हुन् ।

उनले फेसबुकमा लेखेका छन्, ‘राप्रपाका साथीहरु राप्रपाका साथीहरू (कार्यसम्पादन र पदाधिकारी समेत रहेका केही) यति भष्मासुर किन भएका होलान्, आफ्नो पार्टीले पराजय भोग्दै गर्दा र अर्को पार्टीले चुनाव जित्दा पनि उत्साहित हुँदै दुनियाँलाई ट्याग गरेर पोस्ट गर्दैछन् । आफ्नो पदीय हैसियत र दायित्व नबुझ्ने मान्छेलाई सम्हाल्नै गार्हो ।’