रोहितको उत्कृष्ट ब्याटिङमा नेपालले कुवेतलाई दियो २८१ रनको चुनौतीपूर्ण लक्ष्य
नेपाल प्रेस
२०८० वैशाख १६ गते १४:२८
काठमाडौं । रोहित पौडेलको उत्कृष्ट ब्याटिङमा नेपालले जारी एसीसी प्रिमियर कप अन्तर्गत सेमिफाइनल खेलमा कुवेतलाई २ सय ८१* रनको चुनौतीपूर्ण लक्ष्य दिएको छ ।
कीर्तिपुरस्थित त्रिवि क्रिकेट मैदानमा वर्षाका कारण अवरुद्ध भएपछि ४२ ओभरमा छोट्याइएको खेलमा नेपालले ९ विकेट गुमाउँदै २८१ रनको योगफल तयार पार्यो ।
नेपालका कप्तान रोहित पौडेलले ९५ बलमा ७ चौका र तीन छक्कासहित सर्वाधिक ९४ रनको इनिङ खेले । कप्तान मोहमद अस्लामको बलमा यासिन पटेलबाट क्याच आउट हुँदा रोहित ६ रनले शतक बनाउन चुके ।
रोहितले यसअघि, चौथो विकेटका लागि कुशल मल्लसँग १ सय ९ रनको साझेदारी गरेका थिए ।
कुशल ४४ बलमा समान ४ चौका र छक्कासहित ५७ रनमा आउट भए ।
पहिलो विकेटका लागि आसिफ शेखसँग ७७ रनको साझेदारी गर्दै ओपनर कुशल भुर्तेल ४३ रनमा आउट भए ।
अदनन् इद्रिसको बलमा यासिन पटेलबाट क्याचआउट हुनु अघि कुशलले ३९ बल खेल्दै ७ चौका र एक छक्का प्रहार गरे ।
आसिफ २८ बलमा १ चौका र तीन छक्कासहित ३१ रन बनाएर पभेलियन फर्काएका थिए ।
आरिफ शेख १९ बलमा २ चौका र १ छक्काको मद्दतमा १९ रन बनाएर रन आउट भए । भने, सोमपाल कामी १३ रनमा अविजित रहे ।
कुवेतको बलिङमा मोहमद अस्लाम र अदनन् इद्रिसले समान तीन–तीन विकेट लिए । यासिन पटेल र सायब मोनिबले समान एक विकेट लिए ।
आजको खेलमा कुवेतलाई पराजित गरे नेपालले फाइनलमा ओमान अथवा यूएईसँग प्रतिस्पर्धा गर्नेछ ।
यदि पानी परेर खेल रद्द भए पनि नेपाल फाइनल पुग्नेछ । तर, २० ओभरको खेल सकिएर खेल रोकिए डीएल मेथडमा जो अघि रहन्छ त्यही टिम फाइनल पुग्नेछ ।
नेपालले २ सय ८१ रन बनाए पनि पहिलो इनिङमा पाओर प्ले बढी खेलेको भएर एक रन घटेको बताइएको छ ।
*नेपालले २ सय ८१ रन बनाए पनि पहिलो इनिङमा पाओर प्ले बढी खेलेको भएर एक रन घट्यो ।
नेपाल प्रेस
प्रकाशित: २०८० वैशाख १६ गते १४:२८
प्रतिक्रिया
सम्बन्धित खवर
