पक्राउ गर्न आएका प्रहरीलाई सचिव पाण्डेले सोधे- हिरासतमै बस्नुपर्ने हो र ?

काठमाडौं । नेपालीलाई भुटानी शरर्णार्थी बनाएर अमेरिका लैजाने नाममा भएको अर्बभन्दा बढि रकमको ठगी प्रकरणको अनुसन्धानमा राजनीतिक प्रभाव हुन सक्ने आशंका भइरहेका बेला प्रहरीले बहालवाला सचिव र पूर्व गृहमन्त्रीका सल्लाहकारलाई पक्राउ गरेर बोल्ड कदम लिएको छ ।

तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई मंगलबार र सचिव टेकनारायण पाण्डे बुधबार पक्राउ परेका हुन् ।

प्रहरीले सांसद टोपबहादुर रायमाझी र उनका छोरा सन्दीपविरुद्ध पनि पक्राउ पूर्जी लिइसकेको छ । प्रहरीको विशेष टोली बुधबार दिउँसो रायमाझी र उनका छोराको लोकेसन हेर्नमै व्यस्त थियो ।

सम्भवत उनीहरु दुवैजना केही दिनभित्र पक्राउ पर्न सक्ने छन् । ठगी प्रकरणमा चैतको दोस्रो साता काठमाडौं उपत्यका अपराध अनुसन्धान कार्यालयले तीन जनालाई पक्राउ गरेर थप अनुसन्धानका लागि काठमाडौं प्रहरी परिसरलाई बुझाएको थियो ।

संगठित अपराधमा अनुसन्धान गरिरहेको काठमाडौं प्रहरी परिसरले उच्च पदस्थ सरकारी अधिकारी र नेतालाई पक्राउ गर्ने तयारी गरेर यो प्रकरणलाई तार्किक निष्कर्षमा पुर्याउने संकेत गरेको छ ।

‘बहालवाला सचिव पक्राउ पर्न सक्छन् भने यो अनुसन्धानमा संलग्न सबै जना तानिन सक्छन् भनेर हामीले बुझ्नुपर्छ’, अनुसन्धानमा खटिएका एक अधिकारीले भने ।

प्रहरीका अनुसार मंगलबार ललितपुरस्थित निवासबाट पक्राउ पर्दा इन्द्रजित राईले आफू मानसिक रुपमा तयार भएर बसेको बताएका थिए । उनले आफू केही दिनयता राम्रोसँग सुत्नसमेत नसकेको बताएको बुझिएको छ ।

याे पनि पढ्नुस् : भुटानी शरणार्थी बनाउने प्रकरणमा पक्राउ परेको सचिव पाण्डेमाथि अनुसन्धान गर्न तीनदिन म्याद थप

याे पनि : उपराष्ट्रपति कार्यालयका सचिव टेकनारायण पाण्डे पक्राउ

झन्डै एक वर्षअघि आफूहरुलाई भुटानी शरर्णार्थी बनाएर अमेरिका लैजाने नाममा जनही २० देखि ५० लाख रुपैयाँसम्म उठाइए पनि नलगिएको भन्दै दाङका ८१ जनाले प्रहरीमा निवेदन दिएका थिए । काठमाडौं उपत्यका अपराध अनुसन्धान कार्यालयको प्रमुख भएर आएपछि एसएसपी मनोज केसीले फाइल खोलेर अनुसन्धान सुरु गरेका थिए ।

लगत्तै पूर्व परराष्ट्र मन्त्री सुजाता कोइरालाका पीए केशव दुलाल, सानु भण्डारीसहित ३ जना पक्राउ परेका थिए ।

अनुसन्धानका क्रममा भण्डारीले आफुहरुलाई पनि माथिबाट ठगिएको र केही महिनाअघि उनिहरुविरुद्ध अख्तियार दुरुपयोग अनुसन्धान आयोगमा उजुरी दिएको बताएका थिए ।

तेस्रो मुलुक पुनर्स्थापना हुन बाँकी रहेका भुटानी शरर्णाथीको संख्या र समस्या समाधानका लागि २०७६ सालमा गठन भएको कार्यदलले प्रतिवदन तयार गरेको थियो जुन गोप्य राखिएको थियो । उक्त प्रतिवेदनमा सयौँ नेपालीलाई भुटानी शरर्णाथी बनाएर उनीहरुको विवरण समावेश गरिएको स्वयं पीडितले आफूलाई प्राप्त फोटोकपी प्रहरीलाई बुझाएका थिए ।

यही कारण तत्कालीन गृह मन्त्रालयको नेतृत्व र कार्यदलका पदाधिकारी अनुसन्धानको दायरामा तानिएका हुन् । ‘पीडितबाट उठाइएको पैसा माथिल्लो स्तरसम्म बुझाइएको भन्ने छ । विभिन्न व्यक्तिहरुका नाम पनि आएका छन्। तर त्यसलाई प्रमाणबाट पनि देखिनु पर्यो । अहिले हामी त्यसैमा केन्द्रित छौँ’, अनुसन्धान अधिकारी भन्छन् ।

हालसम्म १५० जनाभन्दा बढी पिडितले जाहेरी दिएको बताइएको छ । सचिव पाण्डे र सल्लाहकार राईको बयानबाट थप तथ्यहरु खुल्न सक्ने विश्वास अनुसन्धान अधिकारीको छ ।